Nafta, e qëndrueshme pranë 77 USD – Tensionet në Lindjen e Mesme zbehen nga rritja e rezervave në SHBA

Nafta po qëndron në rritje të lehtë në sesionin e sotëm, ndërsa tregjet po vlerësojnë tensionet në rritje në Lindjen e Mesme, përballë një rritje surprizë të rezervave të naftës në SHBA, që i rrëzuan çmimet me rreth 80 cent në sesionin e kaluar. Nafta Bruto amerikane po tregtohet në rreth 71.7 dollarë për fuçi, ndërsa nafta Brent e Londrës po tregtohet në rreth 77 dollarë për fuçi.

Sipas të dhënave zyrtare në SHBA, rezervat e naftës bruto u rritën me 1.3 milionë fuçi, gjatë javës që u mbyll më 5 janar, në totalin e 432.4 milionë fuçive. Analistët parashikonin një rënie me rreth 700 mijë fuçi.

Analistët shprehen se, rritja e rezervave dhe prodhimi i lartë kanë zbehur efektet e tensioneve në Lindjen e Mesme. Për këtë arsye, tregjet presin një çmim afatshkurtër mes 66 dhe 67 dollarë për fuçi. Të mërkurën, grupi Houthi me bazë në Jemen, kreu sulmin më të madh deri më tani, ndaj anijeve të transportit në Detin e Kuq.

Shtetet e Bashkuara dhe Britania lanë të kuptohet se do të merrnin masa të mëtejshme nëse sulmet vazhdojnë, ndërsa Këshilli i Sigurimit i OKB-së miratoi një rezolutë që kërkon ndërprerjen e menjëhershme të sulmeve.

Gjithashtu, edhe sulmet izraelite në Gazën jugore dhe qendrore u intensifikuan të mërkurën. Ndër zhvillimet e tjera, administrata doganore në Kinë do të publikojë të premten të dhënat tregtare për dhjetorin, të cilat do të japin një panoramë të plotë të kërkesës së përgjithshme në blerësin më të madh në botë të naftës.

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.