Nafta, e qëndrueshme pranë 86 USD për fuçi – Mbështetet nga lajmet se OPEC+ mund ta ulë më tej prodhimin
Nafta po tregtohet e qëndrueshme në sesionin e sotëm, ndërsa një mbështetje po e gjen nga planet e OPEC+ për të ulur më tej prodhimin. Gjithashtu, investitorët po presin disa të dhëna që do të publikohen në Kinë, të cilat do të japin një panoramë më të qartë mbi rimëkëmbjen e kërkesës në ekonominë e dytë më të madhe në botë. Nafta Brent e Londrës po tregtohet në rreth 86 dollarë për fuçi, ndërsa nafta Bruto amerikane po tregtohet në rreth 82 dollarë për fuçi.
Të dyja kontratat publikuan fitime për të katërtën javë me radhë, seria më e gjatë e fitimeve që nga mesi i vitit 2022. Çmimet po gjejnë një mbështetje edhe nga raporti i Agjencisë Ndërkombëtare të Energjisë, e cila parashikon se kërkesa globale do të rritet në 101.9 milionë fuçi në ditë, gjatë këtij viti, 2 milionë fuçi më shumë se vitin e kaluar. Investitorët po presin edhe të dhënat mbi Prodhimin e Brendshëm Bruto në Kinë, për tremujorin e parë të këtij viti.
Në fokus të tregjeve do të jenë edhe fitimet tremujore të korporatave, që mund të përcaktojnë edhe politikën monetare që do të ndjekë Rezerva Federale.
SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.