Nafta, e qëndrueshme pranë 86 USD – Rusia ul prodhimin me 700 mijë fuçi naftë në ditë
Nafta po tregtohet e qëndrueshme në sesionin e sotëm, pas humbjeve të realizuara një ditë më parë, si pasojë e shqetësimeve për ngadalësimin e kërkesës. Investitorët po presin edhe raportin mujor që do të publikohet më vonë gjatë ditës së sotme nga Agjencia Ndërkombëtare e Energjisë, për të pasur një panoramë më të qartë mbi kërkesën globale.
Nafta Brent e Londrës po tregtohet në rreth 86 dollarë për fuçi, ndërsa nafta Bruto amerikane po tregtohet në rreth 82 dollarë për fuçi.
Të dyja kontratat ranë me mbi 1% në sesionin e kaluar. Megjithatë, çmimet po gjejnë një mbështetje nga të dhënat që treguan se Rusia e ka ulur prodhimin me rreth 700 mijë fuçi naftë në ditë. Në anën tjetër, importet e naftës nga Kina, që është ekonomia e dytë më e madhe në botë, u rritën me 22.5% me bazë vjetore, gjatë marsit.
Gjatë kësaj jave, ndërkohë, nafta Bruto amerikane është rritur me 2%, ndërsa nafta Brent me 1.3% dhe pritet të publikojnë fitime për të katërtën javë me radhë.
SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.