Nafta, e qëndrueshme pranë 90 USD – Investitorët, të fokusuar te drejtimi që do të marrë lufta

Nafta po tregtohet e qëndrueshme në sesionin e sotëm, pasi ecuria e tregut është ndikuar nga tensionet në Lindjen e Mesme dhe nga rritja e rezervave të naftës në SHBA. Nafta Brent e Londrës po tregtohet në rreth 90 dollarë për fuçi, ndërsa nafta Bruto amerikane po tregtohet në rreth 85 dollarë për fuçi.

Në sesionin e kaluar amerikan, të dyja kontratat u rritën me rreth 2%, për shkak të shqetësimeve mbi drejtimin që do të marrë konflikti në Lindjen e Mesme. Por, rritja e rezervave të naftës në SHBA sugjeron një dobësim të kërkesës.

Referuar të dhënave zyrtare nga Administrata për Informimin mbi Energjinë, rezervat e naftës bruto u rritën me 1.4 milionë fuçi, gjatë javës që u mbyll më 20 tetor, në totalin e 421.1 milionë fuçive. Analistët parashikonin një rritje të rezervave me 240 mijë fuçi.

Analistët shprehen se tregu vijon të mbetet i paqëndrueshëm, për shkak të luftës mes Izraelit dhe Hamasit, por edhe shenjave për ngadalësimin e kërkesës. Edhe në terma afatmesëm, investitorët do të vazhdojnë të monitorojnë zhvillimet në Lindjen e Mesme, mes frikës se çdo përshkallëzim do të çrregullojë tregjet e naftës dhe do të pengojë furnizimet.

Izraeli ka rënë dakord të shtyjë pushtimin e Gazës për momentin, sipas një raporti, në mënyrë që Shtetet e Bashkuara të mund të nxitojnë me instalimin e mbrojtjes raketore në rajon, për të mbrojtur trupat amerikane. Ndërkohë, shqetësimet makroekonomike vazhduan të peshojnë mbi perspektivën e kërkesës për naftë, pasi të dhënat e aktivitetit të biznesit në eurozonë shënuan një rënie surprizë për tetorin.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.