Nafta, e qëndrueshme pranë 92 USD – Largohet përkohësisht shqetësimi se konflikti mund të përhapet

Nafta po qëndron në rënie të lehtë në sesionin e sotëm, për shkak të shenjave se konflikti mes Hamasit dhe Izraelit mund të mos përhapet edhe në vende të tjera të rajonit. Autokolonat e ndihmave filluan të mbërrijnë në Rripin e Gazës, gjatë fundjavës mes përpjekjeve diplomatike për të frenuar konfliktin midis Izraelit dhe grupit palestinez të Hamasit, të përhapet edhe në rajonin e pasur me naftë. Ndërkohë, që karvanet e ndihmave filluan të mbërrinin në Rripin e Gazës nga Egjipti, liderët arabë dhe ministrat e jashtëm u mblodhën për një samit në Kajro, në përfundim të të cilit nuk u hartua një deklaratë e përbashkët.

Nafta Brent e Londrës po tregtohet në rreth 92 dollarë për fuçi, ndërsa nafta Bruto amerikane po tregtohet në rreth 88 dollarë për fuçi. Javën e kaluar, të dyja kontratat u rritën me mbi 1%, duke publikuar fitime për të dytën javë me radhë, për shkak të shqetësimeve se konflikti mund të përhapej edhe më tej. Për të lehtësuar presionin e furnizimit të tregut, tashmë të shtrënguar për shkak të reduktimit të prodhimit nga OPEC+, SHBA pezulloi sanksionet ndaj Venezuelës pas një marrëveshjeje të qeverisë venezueliane me opozitën.

Presidenti amerikan, Joe Biden, i cili e vizitoi Izraelin javën e kaluar, zhvilloi të dielën disa telefonata me liderët e Kanadasë, Francës, Britanisë, Gjermanisë dhe Italisë, pasi kishte folur me kryeministrin izraelit, Benjamin Netanyahu dhe me Papa Françeskun. Liderët e Francës dhe Holandës do të vizitojnë Izraelin këtë javë, në kërkim të një zgjidhjeje për konfliktin që u ndez më 7 tetor pas sulmit të Hamasit.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.