Nafta, edhe tenderët me “Bord Transparence” – Skema për fermerët, kompanitë garojnë me ofertë fitimi!

Luhatjet e shpeshta të çmimeve të naftës dhe paparashikueshmëria e tyre në tregjet ndërkombëtare, kanë sjellë si rrjedhojë edhe ‘ndryshimin’ e parashikimeve tenderuese në vend.  Pjesë e këtyre ndryshimeve është skema për naftën që u jepet falas fermerëve. Ministria e Bujqësisë ka planifikuar një fond prej 416 milionë lekësh ose 3.5 milionë euro për të financiar nevojën e fermerëve për naftë për 12 muaj. Megjithatë, në këtë rast, parashikimet nuk mund të bëhen kaq afatgjata sa i përket çmimit ndaj edhe kompanitë e tregtimit të naftës në vend nuk do të garojnë me një ofertë sasie por me një ofertë fitimi në lek për litër.

“Do të jetë Autoriteti Kontraktor  ai që do të përcaktojë sasitë përkatëse gjatë zbatimit të kontratës. Operatorët do të ofertojnë me fitim në lek për litër. Ky fitim do të jetë i pandryshuar gjatë gjithë realizimit të kontratave. Sasia e kërkuar nga autoriteti është sasi e pritshme, për të cilën autoriteti do të shprehet në momentin e nënshkrimit të kontratës” shkruhet në dokumentet e tenderit që është i hapur deri me 2 shtator për ofertat e kompanive të naftës në vend që duan të marrin pjesë në tender.

Autoriteti Kontraktor, pra ministria, ka planifikuar që me ketë fond të sigurojë 2.2 milion litra naftë e më një përllogaritje të shpejtë, çmimi referencë për 1 litër naftë në këtë rast është llogaritur rreth 190 lekë.

Në këtë rast, në ofertë kompanitë e tregtimit të karburanteve që do të marrin pjesë në tender duhet të përfshijnë në ofertë 3 elemente;

1-çmimin e bursës, lëvruar sipas kushtit CIF-Shqipëri

2-elementet fiskalë si dhe 3-normën e fitimit të shprehur në vlerë absolute, e cila duhet të jetë e pandryshuar gjatë gjithë kohës së zbatimit të kontratës.

Gjatë kohës së zbatimit të kontratës, për furnizimin me karburant, vlera absolute e normës së fitimit nuk do të ndryshojë gjatë ekzekutimit të kontratës në rast të luhatjes së çmimeve.

Nëse çmimi gjatë kohës së zbatimit të kontratës për furnizimin me karburant, gazoil, ndryshon në raport me çmimin e kontratës, atëherë autoritetet/entet kontraktore duhet të bëjnë likuidimin e mallit sipas faturave periodike të shitjes, mbështetur në çmimin e bursës të publikuar në Buletinin e Njoftimeve Publike, i dërguar nga Drejtoria e Përgjithshme e Doganave, lëvruar sipas kushtit CIF-Shqipëri në këtë moment.

Për të realizuar projektin, kompania duhet të ketë licencë tregtimi me pakicë të karburanteve dhe të ketë pika së paku në 45 qytete të Shqipërisë.

Skema e naftës falas për fermerët parashikon dhënien e naftës falas në sasi nga 50-100 litra për hektar në varësi të kulturës bujqësore që kanë mbjellur. Në total, ne regjistrin e fermerëve jane te regjistruar  83 mijë fermerë dhe referuar listave të publikuara nga AZHBR janë  më shumë se 19 mijë  fermerë  që  kanë  përfituar deri më  tani. Pritshmëritë janë që me ndryshimet e fundit ligjore ku Fondi i Mbështetjes me naftë u shtua me 500 milionë lekë, duke shkuar nga 1.45 miliardë lekë në 1.95 miliardë lekë, numri i përfituesve të arrijë në 35 mijë .

SCAN

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.