Nafta, në rënie mes panikut – BoA: Nafta mund të shkojë në 250 USD nëse mbyllet “Hormuzi”

Nafta po qëndron në rënie në sesionin e sotëm, pavarësisht se Izraeli ka filluar operacionin ushtarak tokësor në Rripin e Gazës, duke shtuar frikën për përshkallëzimin e tensionit në Lindjen e Mesme.

Gjithashtu, investitorët po presin edhe takimin e Rezervës Federale, që fillon të martën dhe përfundon të mërkurën. Banka Qendrore amerikane pritet të mbajë të pandryshuar normën bazë të interesit, pasi ekonomia më e madhe në botë u rrit me me 4.9% me bazë vjetore, në tremujorin e tretë të vitit.

Kryeministri i Izraelit, Benjamin Netanyahu, deklaroi gjatë një fjalimi të shtunën se vendi ka hyrë në fazën e dytë të luftës me Hamasin. Në sesionin e së premtes të javës së kaluar, nafta u rrit në mbi 90 dollarë për fuçi. Përshkallëzimi i luftës ka rritur rrezikun e një çrregullimi të mundshëm të furnizimit të tregut, një shqetësim i vazhdueshëm që kur shpërtheu lufta në datën 7 tetor.

Tregjet ka të ngjarë të shtojnë një prim shtesë të rrezikut të luftës duke pasur parasysh zhvillimet më të fundit. Më shumë prim rreziku mund të faktorizohet në një çmim më të lartë të naftës bruto.

Kontratat e naftës së papërpunuar janë rritur me rreth 3%, që nga sulmi i Hamasit, por potenciali për një konflikt më të gjerë po i mban tregjet nën kujdes. Izraeli dhe territoret palestineze nuk janë lojtarë të rëndësishëm në tregun e naftës, por konflikti po zhvillohet në rajonin më të pasur me naftë, duke ngritur shqetësime se lufta mund të zgjerohet përtej Gazës.

Të dielën, Këshilltari i Sigurisë Kombëtare në SHBA, Jake Sullivan tha se SHBA-të shohin një “rrezik të rritur” të përhapjes së konfliktit në pjesë të tjera në rajonin e Lindjes së Mesme. Irani është një prodhues i madh i naftës dhe mbështetësi kryesor i Hamasit.

Ushtria izraelite ka akuzuar Iranin se ka urdhëruar sulme nga grupet e milicisë që mbështet në Jemen, Irak dhe Liban, dhe ka furnizuar Hamasin me informacione të inteligjencës. Bank of America paralajmëroi javën e kaluar se çdo hakmarrje kundër Iranit mund të rrezikojë kalimin e anijeve përmes Ngushticës së Hormuzit, që konsiderohet si pika më e rëndësishme e tranzitit të naftës në botë. Nëse ngushtica mbyllet, çmimet e naftës mund të rriten mbi 250 dollarë për fuçi, tha banka në shënim.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.