Nafta rimëkëmbet lehtë pas kolapsit – Brenti i Londrës tregtohet pranë 103 dollarë për fuçi, humbet rreth 9 dollarë!

Nafta po qëndron në rritje në sesionin e sotëm, pas kolapsit me rreth 9% në sesionin e kaluar, për shkak të shenjave të ngadalësimit të kërkesës. Nafta Brent po tregtohet në rreth 103 dollarë për fuçi, ndërsa në sesionin e kaluar ra me 9.5%, rënia më e madhe ditore që nga marsi i këtij viti. Nafta Bruto amerikane po tregtohet në rreth 100 dollarë për fuçi.

Analistët po e cilësojnë më tepër një sesion korrektimi dhe pritshmëritë janë që tendenca të vijojë në rënie, për shkak të një recesioni të mundshëm.

Ndërkohë, Sekretari i Përgjithshëm i OPEC, Mohammad Barkindo, deklaroi se industria e naftës është në vështirësi për shkak të disa viteve me radhë të investimeve të ulëta. Sipas tij, mungesa e furnizimit të tregut mund të zëvëndësohet nëse lejohen eksportet nga Irani dhe Venezuela. Në anën tjetër, ish-Presidenti i Rusisë, Dimitry Medvedev, paralajmëroi se propozimi i Japonisë për të vendosur tavan ndaj çmimeve të naftës ruse, që përkthehet në një përgjysmim krahasuar me nivelet aktuale, do të thotë se në treg do të ketë më pak naftë.

Në këtë situatë, sipas tij çmimet e naftës do të rriten në 300 apo 400 dollarë për fuçi. Në anën tjetër, qeveria e Norvegjisë ndërhyri për t’i dhënë fund grevës në sektorin e naftës, duke i thënë fund një krize të mundshme të energjisë në Europë.

Gjithsesi, shqetësimet për një recesion global vijojnë të ushtrojnë presion mbi çmimet. Disa analistë parashikojnë se ekonomia e SHBA, që është më e madhja në botë, do të ketë rënë në recesion gjatë periudhës Prill-Qershor.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.