Nafta rritet me mbi 4 USD për fuçi – SHBA vendos sanksione ndaj 2 kompanive që transportonin naftë ruse

Nafta është rritur me mbi 4% në sesionin e sotëm, pasi Shtetet e Bashkuara të Amerikës kanë vendosur sanksione të reja ndaj eksporteve të naftës ruse, duke shtuar shqetësimet për furnizimin e tregut. Nafta Brent e Londrës ka fituar rreth 4% të vlerës dhe është ngjitur në mbi 89 dollarë për fuçi, ndërsa nafta bruto amerikane po tregtohet në rreth 86 dollarë për fuçi.

Shtetet e Bashkuara të Amerikës vendosën sanksione ndaj dy kompanive të transportit të naftës, pasi kanë shkelur tavanin e çmimeve të vendosur nga G7-a, një mekanizëm i krijuar për të mbajtur nën kontroll flukset e naftës ruse në tregje. “Ky vendim nënvizon  angazhimin e Departamentit të Thesarit me partnerët e tij ndërkombëtarë për të reduktuar fitimet e qeverisë ruse nga nafta dhe për të kufizuar makinerinë ruse të luftës”, tha Departamenti amerikan i Thesarit, në një deklaratë.

G7-a, Australia dhe Bashkimi Europian zbatuan një tavan prej 60 dollarë për fuçi për naftën ruse më 5 dhjetor të vitit të kaluar. Vendimi erdhi së bashku me një masë të BE-së dhe Britanisë së Madhe për të vendosur ndalimin e importet detare të naftës së papërpunuar ruse. Zyra e Departamentit të Thesarit për Kontrollin e Pasurive të Huaja tha se janë vendosur sanksione ndaj dy pronarëve të anijeve cisternë që transportonin naftë ruse me çmim mbi kufirin e vendosur: njëri në Turqi dhe tjetri në Emiratet e Bashkuara Arabe.

Tankeri YasaGolden Bosfor, që është në pronësi të Ice Pearl Navigation Corp me bazë në Turqi, thuhet se ka transportuar naftë bruto me çmim mbi 80 dollarë për fuçi. Ndërsa SCF Primorye, e cila është në pronësi të Lumber Marine SA me bazë në Emiratet e Bashkuara Arabe, transportonte naftë ruse me çmim mbi 75 dollarë për fuçi nga një port në Rusi, pasi hyri në fuqi mekanizmi i kufirit të çmimit.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.