Nafta rritet pranë 76 USD – Por, pritet të publikojë humbje javore prej mbi 5%
Nafta po qëndron në rritje me mbi 2% në sesionin e sotëm, por pritet të publikojë humbje javore prej mbi 5%, dhe po tregtohet në nivelin më të ulët në 6 muajt e fundit. Pavarësisht rritjes së çmimeve, investitorët janë të shqetësuar për kërkesën e dobët për energji në Azi, të kombinuar me prodhimin e lartë të naftës së papërpunuar në SHBA. Nafta Brent e Londrës po tregtohet pranë 76 dollarëve për fuçi, ndërsa nafta Bruto amerikane (WTI) po tregtohet pranë 71 dollarëve për fuçi.
Të dyja kontratat po qëndrojnë në nivelin më të ulët që nga fillimi i qershorit të këtij viti. Në një sinjal që tregtarët besojnë se tregu mund të jetë i mbifurnizuar, Brent dhe WTI janë gjithashtu në gjendjen “kontango”, që është një strukturë e tregut në të cilën çmimet “spot” tregtohet me një çmim më të ulët krahasuar me çmimet “futures”.
Edhe shqetësimet për ngadalësimin e ekonomisë kineze kanë ushtruar presion mbi çmimet. Të dhënat e doganave në Kinë treguan se importet e naftës bruto ranë me 9% në nëntor, krahasuar me një vit më parë, pasi nivelet e larta të rezervave, treguesit e dobët ekonomikë dhe ngadalësimi i porosive nga rafineritë e pavarura kanë dobësuar kërkesën.
Edhe në Indi, konsumi i karburantit shënoi rënie në nëntor, i goditur nga reduktimi i udhëtimeve në konsumatorin e tretë më të madh të naftës në botë. Rënia e çmimeve vjen pavarësisht marrëveshjes së OPEC+ për të ulur vullnetarisht prodhimin me 2.2 milionë fuçi, gjatë tremujorit të parë të vitit 2024.
Arabia Saudite dhe Rusia, dy eksportuesit më të mëdhenj të naftës në botë, i bënë thirrje të gjithë anëtarëve të OPEC+ që t’i bashkohen marrëveshjes për uljen e prodhimit, për të mirën e ekonomisë globale. Në SHBA, prodhimi mbetet afër niveleve rekord, prej mbi 13 milionë fuçi në ditë, treguan të mërkurën të dhënat e Administratës për Informimin mbi Energjinë.
SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.