Tregu i monedhave, në pritje të punësimit – Jeni realizon performancën më të mirë që nga janari

Dollari amerikan është forcuar lehtë në sesionin e fundit të javës, ndërsa jeni japonez është ndër monedhat me performancën më të mirë dhe pritet të publikojë fitime, për të katërtën javë me radhë, për shkak të optimizmit se politika monetare ultra-lehtësuese në Japoni mund të jetë drejt fundit.

Megjithatë, investitorët po tregohen të kujdesshëm, në pritje të të dhënave mbi punësimin në SHBA. Guvernatori i Bankës së Japonisë, Kazuo Ueda deklaroi të enjten se banka qendrore kishte disa opsione mbi të cilat do të synonte normat e interesit, të cilat aktualisht janë në territor negativ.

Jeni u rrit me mbi 2% në sesionin e kaluar, fitimet më të mëdha ditore që nga janari i këtij viti. Vetëm një muaj më parë, jeni po këmbehej në rreth 152 në raport me dollarin, niveli më i ulët në thuajse 3 dekadat e fundit.

Banka e Japonisë do të mblidhet më 18 dhjetor dhe tregtarët po përgatiten për paqëndrueshmëri, edhe nëse shanset për një ndryshim të drejtpërdrejtë në politikë monetare janë të ulëta. Ndërkohë, përballë monedhave të tjera, dollari amerikan ka pasur një tendencë në rritje, por megjithatë volumi është i ulët, për shkak se investitorët po presin të dhënat mbi punësimin në SHBA.

Të dhënat e publikuara gjatë kësaj jave sugjerojnë se tregu i punës në SHBA po ngadalësohet, por nuk evidentohet ndonjë dobësi materiale. Euro po këmbehet në rreth 1.077 dollarë, ndërsa paundi po këmbehet në rreth 1.256 dollarë. Të dyja monedhat pritet të publikojë humbje javore prej rreth 1%.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.