Nafta zbret poshtë 80 USD për fuçi – Investitorët presin takimin e OPEC+ të enjten
Çmimet e naftës po qëndrojnë në rënie në sesionin e parë të kësaj jave, me Brentin e Londrës që ka zbritur poshtë 80 dollarëve për fuçi, pasi investitorët po presin takimin e OPEC+ që zhvillohet të enjten. Nafta Brent po tregtohet pranë 80 dollarëve për fuçi, ndërsa nafta bruto amerikane po tregtohet në rreth 75 dollarë për fuçi.
Të dyja kontratat u rritën lehtë javën e kaluar, fitimet e para në pesë javët e fundit, mbështetur nga pritshmëritë se Arabia Saudite dhe Rusia mund të rikthejnë shkurtimet vullnetare të furnizimit në fillim të vitit 2024. Analistët parashikojnë se OPEC+ do të diskutojë mundësinë për të vijuar me marrëveshjen për uljen e prodhimit edhe në vitin 2024, për të mos lejuar një rënie të mëtejshme të çmimeve, për shkak të ngadalësimit të kërkesës.
Analistët e ING shprehen se ndjenja e tregut mbetet negative, duke pasur parasysh mosmarrëveshjen brenda OPEC+ mbi kuotat e prodhimit, megjithëse ata presin që Arabia Saudite të vijojë me uljen vullnetare të prodhimin prej 1 milion fuçi në ditë, në vitin e ardhshëm. Eksportet nga vendet e OPEC-ut kanë rënë me 1.3 milionë fuçi në ditë, nën nivelet në prill, thanë në një shënim analistët e Goldman Sachs, në përputhje me objektivat e furnizimit të grupit.
“Ne presim që Arabia Saudite dhe Rusia të vijojnë me uljen vullnetare të prodhimit të paktën edhe në tremujorin e parë të 2024-ës”, shtoi banka. Megjithatë, pavarësisht këtyre pritshmërive, çmimet janë gjendur nën presion për shkak të rritjes së rezervave dhe prodhimit në SHBA.
Agjencia Ndërkombëtare e Energjisë parashikon një suficit të lehtë në tregjet globale të naftës në vitin 2024, edhe nëse vendet e OPEC+ shtyjnë tkurrjen e prodhimin edhe në vitin e ardhshëm. Çmimet e naftës janë stabilizuar edhe për shkak të uljes së tensioneve gjeopolitike në Lindjen e Mesme, pas një armëpushimi në Gaza dhe shkëmbimit të pengjeve e të burgosurve me Izraelit dhe Hamasit.
SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.