Nafta zbret pranë 77 USD – Arabia ul çmimet për klientët aziatikë, zbehet efekti i luftës në Gaza

Nafta po qëndron në rënie të konsiderueshme në sesionin e sotëm, për shkak të uljeve drastike që ofroi eksportuesi më i madh i naftës në botë, Arabia Saudite për klientët aziatike dhe rritjes së prodhimit nga OPEC, që kanë kompensuar shqetësimet për përshkallëzimin e tensioneve gjeopolitike në Lindjen e Mesme. Nafta Brent e Londrës po tregtohet në rreth 77 dollarë për fuçi, ndërsa nafta Bruto amerikane po tregtohet në rreth 72 dollarë për fuçi.

Të dyja kontratat u rritën me rreth 2%, gjatë javës së parë të 2024-ës, pasi investitorët u rikthyen nga pushimet për t’u fokusuar të rreziqet gjeopolitike në Lindjen e Mesme, pas sulmeve të grupit Houthi ndaj anijeve tregtare në Detin e Kuq.

Sekretari amerikan i Shtetit, Antony Blinken, i cili ndodhet në Lindjen e Mesme këtë javë, paralajmëroi se konflikti në Gaza mund të përhapet në të gjithë rajonin nëse nuk do të ketë përpjekje të përbashkëta për paqen, megjithëse kryeministri izraelit, Benjamin Netanyahu u zotua të vazhdojë luftën derisa Hamasi të eliminohet.

Por, ky presion në rritje për çmimet u kompensua nga të dhënat e Organizatës së Vendeve Eksportuese të Naftës, që treguan se prodhimi u rrit me 70,000 fuçi në ditë në dhjetor, në totalin e 27.88 milionë fuçive në ditë. Rritja e ofertës dhe konkurrenca me prodhuesit rivalë, e shtyu Arabinë Saudite të dielën të ulë çmimin zyrtar të shitjes për shkurtin, për klientët e saj aziatikë, në nivelin më të ulët në 27 muajt e fundit.

Lidion Kulla/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.