Ndikimi i luftës në ekonominë e Izraelit – Thirrja nën armë e 300 mijë rezervistëve, prek disa sektorë

Ndërsa Izraeli përgatitet për një luftë të gjatë me implikime masive humanitare, ka shqetësime se kjo mund ta rëndojë shumë ekonominë dinamike të këtij vendi. Pasi militantët e Hamasit sulmuan befasishëm gjatë fundjavës, qeveria e Izraelit thirri më shumë se 300,000 rezervistë në shërbim, një shifër kjo e paprecedentë. Ushtria e përhershme, forcat ajrore dhe marina e Izraelit përbëhet nga 150,000 trupa. Forcat rezervë, janë rreth 450,000 trupa, shumë prej të cilëve janë më me përvojë në luftime sesa ushtarët më të rinj në ushtrinë e përhershme. Rezervistët janë mësues, punonjës të teknologjisë, sipërmarrës të rinj, fermerë, avokatë, mjekë, infermierë, punonjës të turizmit dhe fabrikave.

Dëmi ekonomik, megjithatë, do të varet nga sa kohë rezervistët do të jenë larg vendeve të punës në vendin, i cili ka një popullsi prej mbi 9 milionë banorë dhe një prodhim të brendshëm bruto prej rreth 522 miliardë dollarë. Sipas analistëve, në një rast si ky, turizmi “vdes” menjëherë.

Por, shumë nga sektorët kryesorë të punësimit të Izraelit do të vazhdojnë pandërprerë gjatë luftës për shkak të faktit se aty janë të punësuar kryesisht të huaj. Kjo përfshin sektorin kimik të Izraelit, i cili është një burim kryesor i eksporteve.

Rajoni i Detit të Vdekur është i pasur me minerale. Porti i Ashdodit, vetëm 20 milje në veri të Rripit të Gazës, është një qendër kryesore për eksportin e potasit. Wall Street ishte aq i shqetësuar për perspektivën e furnizimit me potas nga Izraeli, saqë stoqet e plehrave kimike patën rritje të konsiderueshme në fillim të javës.

Deri më tani këtë javë, indeksi kryesor i aksioneve izraelite është ulur me 6%. Nuk ka pasur paralajmërime të reja nga agjencitë e vlerësimit për borxhin e Izraelit.Por, sado të zymta janë gjërat tani, do të ketë një përmirësim për vendin dhe ekonominë.

Probleme priten edhe për investitorët e huaj. Pothuajse çdo kompani e madhe teknologjike amerikane ka zyra të rëndësishme prodhimi, ose kërkimi dhe zhvillimi në Izrael, duke përfshirë Microsoft, Alphabet, Apple dhe Oracle. Intel po investon në një fabrikë prodhimi 30 minuta larg kufirit të Gazës.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.