Ndryshimet klimatike po vrasin njerëz – Vijon vala e të nxehtit rekord në Europë

Vala e të nxehtit rekord që po shkakton viktima në Europë po përhapet nga veriu në lindje. Temperaturat mund të jenë më të larta se 40 gradë celsius në Mbretërinë e Bashkuar, një rekord për vendin që temperaturën më të lartë të regjistruar ndonjëherë ishte 38.7 gradë celsius në Kembrixh në korrik të 2019-ës.

Të hënën u regjistrua temperatura 38.1 gradë celsius në lindje të vendit, më e larta për këtë vit, dhe e treta më e lartë e regjistruar ndonjëherë në vend. Uellsi theu një rekord me 37.1 gradë celsius, ndërsa në Londër temperatura më e lartë e shënuar ishte 37.5 gradë celsius.

Për herë të parë autoritetet në Mbretërinë e Bashkuar kanë vendosur alarmin në nivelin katërt, që është më i larti dhe nënkupton emergjencë kombëtare, duke paralajmëruar se i nxehti është i rrezikshëm dhe për më të rinjtë dhe njerëzit e shëndetshëm.

Pjesa më e madhe e shkollave në vend qëndron mbyllur ndërsa priten dhe pezullime të reja në sektorin e transportit.

Në Irlandë u regjistrua temperatura prej më shumë se 33 gradë celsius në Fublin, që është rekord i ri që nga viti 1887.

Shkencëtarët shprehen se rritja e temperaturave është pasojë e ngrohjes globale. Kryeministri spanjoll Pedro Sanchez u shpreh se ndryshimet klimatike po vrasin njerëz, ekosisteme dhe biodiversitetin.

Dhe Spanja po përballet me temperatura rekord prej më shumë se një jave në një kohë që vendi është në gjendje alarmi për shkak të vatrave të shumta të zjarrit që kanë shkrumbuar qindra hektarë terren. Në pjesën më të madhe të vendit temperaturat kanë arritur në 40 gradë celsius.

Dhe Franca po vuan pasojat e valës së të nxehtit por metereologët parashikojnë një ulje të temperaturave ditët në vijim. Por gjithësesi vendi ka shënuar rekorde për sa i përket temperaturave deri në 39.3 gradë celsius në veri perëndim, mbi 42 gradë celsius në qendër dhe 42.6 gradë celsius në jugperëndim.

Rekorde rajonale në Francë janë shënuar në dhjetëra qytete, në një kohë që rekordi më i lartë i vendit është ai i 28 qershorit 2019, me temperaturat mbu 46 gradë celsius në jug.

Holanda gjithashtu regjistroi ditën e saj më të nxehtë me temperaturat që kanë arritur në 35.4 gradë celsius në jugperëndim  të vendit. Ndërsa pritet që temperaturat të shkojnë deri në 39 gradë celsius në jug dhe në qendër të vendit duke iu afruar rekordit kombëtar prej 40.7 gradë në 25 korrik 2019.

Belgjika po përballet me temperatura deri në 40 gradë celsius, ndërsa në vende të ndryshme pune ka pasur reduktime oraresh.

Ballkani pritet të përballet me ditët më të nxehta këtë findjavë, ndërkohë që në Slloveni dhe Kroaci ka pasur zjarre sporadike

Sipas komisionit europian, pothuajse gjysma e territorit të Bashkimit Europian rrezikohet nga thatësira për shkak të mungesës së reshjeve, situatë që po vendos në rrezik të korrurat në vende si Franca, Rumania, Spanja, Portugalia dhe Italia.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.