New York Times bllokon ChatGpt -“Artikujt tanë nuk do të përdoren për trajnimin e inteligjencës artificiale”

Qëndrim i qartë kundër inteligjencës artificiale nga një prej gazetave më të njohura në botë. New York Times ka vendosur të bllokojë rrjetin e internetit të OpenAI, kompanisë që zhvilloi softuerin ChatGpt, duke e penguar atë të ketë akses në artikujt e saj. Në thelb, përmbajtja e gazetës nuk mund të përdoret më për të trajnuar inteligjencën artificiale. New York Times po shqyrton gjithashtu një padi kundër OpenAI për shkelje të të drejtave të autorit.

Akuza që New York Times po mendon të bëjë kundër OpenAI është shkelje e të drejtës së autorit nëpërmjet përdorimit, pa pëlqim, të artikujve të saj për të trajnuar inteligjencën artificiale. Në muajt e fundit, disa autorë e kanë paditur kompaninë, duke e akuzuar atë për skanimin e përmbajtjes së tyre – për të cilën ata kanë të drejtat – pa autorizimin e tyre të qartë për të trajnuar ChatGpt. Në fakt, chatbot duhet të ‘trajnohet’ në mënyrë adekuate që të jetë në gjendje t’u japë përgjigje të plota dhe të sakta përdoruesve.

Në thelb, akuza e bërë nga autorët dhe gazeta është se ChatGpt përdor përmbajtjen e mbuluar nga e drejta e autorit për t’u dhënë përgjigje përdoruesve të saj, pa iu referuar burimit të atij informacioni.

Nëse OpenAI shpallet fajtor, mund të detyrohet të shkatërrojë të gjitha të dhënat e mbledhura dhe të përdorura nga ChatGpt pa autorizim dhe t’i rikrijojë ato, por duke përdorur materiale për të cilat ka marrë dritën jeshile nga mbajtësit e të drejtave. Sipas ligjit amerikan, OpenAI mund të përballet gjithashtu me një gjobë deri në 150 mijë dollarë për çdo “shkelje të qëllimshme të së drejtës së autorit”.

Dorina Kurtaj /SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.