Nga e hëna, rikthehen aplikimet elektronike për lejet e ndërtimit! AKSHI bën bilancin: Nga 1225 shërbime, 1214 janë rikthyer

Duke nisur nga e hëna e ardhshme do të mund të aplikohet elektronikisht për lejet e ndërtimit, duke rikthyer në këtë mënyrë një nga shërbimet më të rëndësishme të portalit qeveritar e-Albania. Kjo u bë e ditur nga Agjencia Kombëtare e Shoqërisë së Informacionit, sipas së cilës, poothuajse të gjitha shërbimet elektronike janë normalisht të aksesueshme.

Aktualisht, sipas AKSHI-t, 1 mijë e 214 shërbime nga 1 mijë e 225 të tilla mund të përdoren nga qytetarët dhe bizneset si më parë.

Në njoftimin për mediat, AKSHi deklaron se janë në funksion shërbimet për pasaportat, ndihmën ekonomike, strehimin social dhe vërtetimet e diplomave.

Njësimi i diplomave, vërtetimi i pagesës së aftësisë së kufizuar dhe kryerja e pagesave të ujit dhe energjisë mbeten ende jashtë funksionit.

Tre javë më parë, portali qeveritar pësoi një sulm kibernetik që nxori jashtë funksionit shërbimet pulike, duke krijuar problematika të mëdha në marrjen e shërbimeve publike për qytetarët dhe bizneset.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.