Ngrohja globale shënon një rekord të ri – Janari i këtij viti, muaji më i ngrohtë në histori

Temperatura mesatare globale në janar 2024 ishte 1.6°C mbi nivelet para-industriale për muajin, që do të thotë se planeti ka tejkaluar standardin prej 1.5°C për 12 muajt e fundit. Janari i vitit 2024 ishte janari më i ngrohtë i regjistruar në nivel global, sipas të dhënave të Shërbimit të Ndryshimeve Klimatike – C3S të Copernicus.

Duke raportuar në emër të Komisionit Europian, C3S publikoi përditësimin e tij mujor të klimës mbi ndryshimet e vërejtura në temperaturat globale të ajrit dhe detit, mbulesën e akullit të detit dhe variablat hidrologjike. Të gjitha gjetjet e raportuara bazohen në analizat e gjeneruara nga kompjuteri të të dhënave mbi variablat e klimës atmosferike, tokësore dhe oqeanike.

C3S raportoi një temperaturë mesatare të ajrit sipërfaqësor prej 13.14 C në janar 2024, që është 0.70 C mbi mesataren 1991 – 2020 për janarin dhe 0.12 C mbi temperaturën e janarit më të ngrohtë të mëparshëm në 2020 – ën.

Kjo e bën atë muajin e tetë me radhë që është më i ngrohti i regjistruar për muajin përkatës të vitit. 2024 filloi me një janar që ishte 1.66 C më i ngrohtë se një vlerësim i mesatares së janarit për 1850 – 1900, periudha e caktuar e referencës para – industriale.

C3S i bazoi këto gjetje në një sistem të quajtur ERA5 – të dhëna për orë të krijuara duke përdorur miliarda matje nga satelitët, anijet, avionët dhe stacionet e motit në mbarë botën. Organizata gjithashtu raporton se temperatura mesatare globale për dymbëdhjetë muajt e fundit – shkurt 2023 deri në janar 2024 është më e larta, në 0.64 C mbi mesataren 1991 – 2020 dhe 1.52 C mbi mesataren para-industriale 1850 – 1900.

Temperaturat europiane variuan në janar 2024 nga shumë më poshtë mesatares 1991-2020 mbi vendet nordike në shumë mbi mesataren në jug të kontinentit. Jashtë Europës, temperaturat ishin shumë mbi mesataren në Kanadanë lindore, Afrikën veriperëndimore, Lindjen e Mesme dhe Azinë Qendrore, dhe nën mesataren mbi Kanadanë perëndimore, SHBA-në qendrore dhe pjesën më të madhe të Siberisë lindore.

Dorina Kurtaj /SCAN

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.