Nikola Gruevski: Ish-kryeministri i Maqedonisë së Veriut dënohet për herë të katërt me burgim

Ish-kryeministri i Maqedonisë së Veriut është dënuar për herë të katërt që nga viti 2018 dhe është dënuar me nëntë vjet burg për shpërdorim detyre.

Nikola Gruevski u shpall fajtor për urdhërimin e rrënimit të një kompleksi banesor dhe afarist shumë milionë euro në Shkup në vitin 2011.

Prokurorët e etiketuan incidentin një akt hakmarrjeje politike dhe thanë se kompleksi i përkiste kreut të një partie të vogël që sapo ishte larguar nga qeveria e Gruevskit.

Tre të pandehur të tjerë gjithashtu u burgosën në këtë rast, duke përfshirë ish-ministrin e transportit të Maqedonisë së Veriut, ish-kryebashkiakun e Shkupit dhe një zyrtar komunal.

Tre të dyshuarit u shpallën fajtorë për deklarimin e rremë të ndërtimit të paligjshëm dhe lehtësimin e prishjes së tij me eksploziv.

Ata kishin argumentuar se prishja ishte e justifikuar sepse kompleksi nuk ishte ndërtuar siç duhet.

Gjykata në Maqedoninë e Veriut urdhëroi që të tre të paguajnë bashkërisht 11 milionë euro dëmshpërblim, përveç dënimeve me burg.

Ish-kryeministri 51-vjeçar prej më shumë se tre vitesh jeton në Hungari.

Ai u largua nga Maqedonia e Veriut në nëntor 2018 pasi u dënua me dy vjet burg për përdorimin e një Mercedesi prej 600,000 eurosh të blerë me para publike për përdorim personal.

Dy vjet më vonë, ai u dënua gjithashtu në mungesë për nxitje të dhunës dhe iu dha një dënim shtesë prej 18 muajsh.

Në prill, një gjykatë dënoi gjithashtu Gruevskin me shtatë vjet burg për përvetësim prej 1.3 milionë eurosh në donacione partiake.

Akuzat lidhen të gjitha me një skandal përgjimi të vitit 2015, kur doli se bisedat telefonike të më shumë se 20,000 njerëzve përfshirë politikanë, gjyqtarë, policë, gazetarë dhe diplomatë të huaj që ishin regjistruar në mënyrë të paligjshme.

Skandali shkaktoi zgjedhje të parakohshme në vitin 2016, në të cilat partia VMRO-DPMNE e Gruevskit humbi nga lideri socialdemokrat Zoran Zaev.

Maqedonia e Veriut i ka kërkuar pa sukses kryeministrit të Hungarisë Viktor Orban, një aleat i Gruevskit, që të ekstradojë ish-udhëheqësin nacionalist.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.