Nis numërimi mbrapsht për nxjerrjen e mineraleve nga deti – Planet e kompanive të mëdha dhe shqetësimet për ekuilibrin e jetës nënujore

Minierat në det të thellë mund të ofrojnë një zgjidhje për mungesën globale të metaleve të nevojshme për elektrifikimin, por gjithashtu paraqet rreziqe për biodiversitetin dhe ekuilibrin e jetës nënujore. Në fund të detit gjenden miliarda ton minerale kritike, si nikeli, bakri, kobalti dhe mangani, me vlerë miliarda dollarë. Këto metale janë jetike për bateritë e automjeteve elektrike dhe energjinë e pastër, dhe gjenden me bollëk në një pjesë të Oqeanit Paqësor të njohur si Brezi Clarion-Clipperton, që mbetet kryesisht e paeksploruar.

Rregulloret ndërkombëtare për minierat në det të thellë ende nuk janë finalizuar dhe agjencia përkatëse rregullatore e OKB-së, Autoriteti Ndërkombëtar i Shtratit të Detit -ISA, pasi ka humbur kohët e fundit një afat kyç për të vendosur kontrolle, së shpejti do të fillojë të pranojë kërkesat. Kompania ‘Metals’ planifikon të paraqesë aplikacionin e saj verën e ardhshme dhe të fillojë minierat nga viti 2025, duke bërë që shumë të shqetësohen për implikimet e mundshme.

Sipas ‘Benchmark Mineral Intelligence’, një kompani e fokusuar në gjurmimin e metaleve thelbësore për tranzicionin e energjisë, midis 2020 dhe 2030 kërkesa për bateri për nikel pritet të rritet me rreth 20 herë, kërkesa për mangan pritet të rritet tetëfish dhe kërkesa për bateri kobalt pritet të katërfishohet. Nikeli, bakri, kobalti dhe mangani janë të bollshme në fundin e detit në formën e nyjeve polimetalike dhe mbulojnë deri në 70% të shtratit të detit në disa zona.

Në zonën Clarion-Clipperton, vlerësohet se ka të paktën 20 miliardë ton minerale, dhe rreth 270 milionë ton nikel. Zona e projektit ku Kompania Metals shpreson të fillojë punimet besohet të ketë depozitën më të madhe të nikelit në botë dhe përfshin afro 29 mijë milje katrore shtrat të detit. Edhe pse kjo është vetëm rreth 0.02% e sipërfaqes totale, kompania thotë se ky burim, i kombinuar me një zonë tjetër projekti ku kompania ka një kontratë eksplorimi, përmban minerale të mjaftueshme për të fuqizuar rreth 280 milionë automjete elektrike, pra afërsisht të gjitha automjetet që gjenden aktualisht në treg në SHBA. Dëmtimi i mundshëm i ekosistemeve, megjithatë, është një shqetësim i madh për grupet mjedisore që kundërshtojnë minierat në det të thellë.

Raportet sugjerojnë se mund të ketë midis 5 mijë dhe 8 mijë lloje që nuk janë identifikuar ose nuk janë zbuluar ende në zonën Clarion-Clipperton. Midis tyre janë koralet, sfungjerët, oktapodët dhe iriqët e detit, specie që shpesh përdorin nyjet polimetalike si strehë dhe në mënyrë të pashmangshme do të vuajnë nëse këto nyje thithen nga fundi i oqeanit.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.