Brexit zhduk pub-et, mbyllen 2 në ditë! – Analistët: Brenda 25 vitesh nuk do të mbetet hapur asnjë!

Një nga simbolet e Britanisë së Madhe duket se i ka ditët e numëruara. Pub-i, vendi tradicional i takimit për të biseduar e konsumuar birrë, po kthehet në një specie në zhdukje. 386 pub-e, janë mbyllur në 6 muajt e parë të vitit në Angli dhe Uells, ose më shumë se dy në ditë, sipas të dhënave të publikuara nga Zyra Kombëtare e Statistikave.

Trendi duket se po përshpejtohet, pasi në të gjithë vitin 2022 ka pasur 386 mbyllje, pothuajse njësoj si në gjashtëmujorin e parë të 2023-shit. Për më tepër, nga janari deri në mars të këtij viti 153 pub-e pushuan së ekzistuari, një numër që është rritur në 230 ndërmjet prillit dhe qershorit. Disa janë prishur, të tjera janë shndërruar në shtëpi, disa të tjera kanë pushuar çdo aktivitet dhe presin fatin e tyre.

Pub-et vazhdojnë të jenë një prani e rëndësishme në çdo qytet dhe lagje, pothuajse dyzet mijë kanë mbetur. Ndërkohë, dhjetë vjet më parë ishin 55 mijë.

Me këtë ritëm, në 25 vjet ato do të zhduken plotësisht. Ndoshta disa do të mbeten të ruajtura si ekspozita muzeale, pothuajse si kabinat e kuqe telefonike që turistët duan t’i fotografojnë, por që prej kohësh janë jashtë përdorimit.

Pub-et janë në krizë prej disa kohësh për shkak se zakonet e britanikëve kanë ndryshuar. Ata kalojnë më shumë kohë në shtëpi, ose nëse dalin zgjedhin të shkojnë në një bar për të pirë verë. Me tejkalimin e pandemisë dhe përfundimit të mbështetjes së qeverisë, në 18 muajt e fundit kriza është përkeqësuar me çmimet e larta të energjisë, vështirësitë në gjetjen e stafit dhe rritjen e inflacionit që ka rritur të gjitha kostot.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.