Parizienët, të “zemëruar” me Lojërat Olimpike – Planifikimi dhe rreziqet e sigurisë janë në plan të parë

Reagimet në kryeqytetin francez janë negative kur kanë mbetur rreth 100 ditë nga hapja e Lojërave Olimpike. Shumë parizienë po planifikojnë të largohen, duke parashikuar se kryeqyteti do të bëhet i pabanueshëm dhe i mbipopulluar. Sistemi i transportit do të paralizohet nga fluksi i 16 milionë vizitorëve të pritshëm, ose një sulm terrorist që do të dëmtojë ceremoninë e hapjes në lumin Senë.

Organizatorët e Olimpiadës dhe zyrtarët e qytetit janë përpjekur të sigurojnë banorët se qyteti është gati. Është thënë shumë se sa “magjike” do të jetë qendra historike e Parisit kur të shndërrohet në një arenë sportive në natyrë me ngjarje në monumente si Tour Eiffel dhe Place de la Concorde.

Pothuajse çdo çështje që lidhet me Lojrat Olimpike përthyhet përmes prizmit të ndarjeve kulturore, racore dhe ekonomike që përshkojnë vendin. Ka pyetje të shumta nëse Franca do të jetë në gjendje të presë Lojërat, duke pasur parasysh presionet mbi infrastrukturën dhe rreziqet e terrorizmit. Pa dyshim, disa sfida do të jenë më të theksuara në Paris për shkak të kulturës lokale, gjeopolitikës dhe zgjedhjes së guximshme për të organizuar gara në vende të përkohshme ende të pandërtuara në qendër të qytetit.

Sindikatat e sektorit publik, nga punonjësit e hekurudhave te stafi i muzeut, po kërcënojnë me greva për të marrë kompensim për pushimet e tyre të shenjta verore. Niveli i alarmit të terrorizmit u ngrit përsëri në mars.

Me disa pjesë të kryeqytetit të mbyllura për trafikun e makinave dhe transportin publik të mbushur me njerëz, zyrtarët kanë krijuar një fushatë reklamuese dhe faqe interneti me sloganin ‘Përgatituni për Lojërat’. Përdoruesit mund të fusin itinerarin e tyre dhe të shohin se si do të ndikohet.

Në një ngjarje shtypi të kohëve të fundit, zyrtarët e qytetit dhanë një përshkrim optimist se si përgatitjet ishin në rrugën e duhur, nga shtimi i 10.000 biçikletave të tjera me qira deri në përfundimin e një përpjekjeje pastrimi për të pritur gara noti në lumin Senë. Por cila mbetet strategjia për të krijuar emocione rreth Lojërave? Zyrtarët e qytetit përgjigjen me një buzëqeshje të hidhur: shumë verë të mirë franceze.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.