Një konsorcium europian i armëve për një rol global – Situatat aktuale gjeopolitike, industria e armëve në lulëzim

Një konsorcium europian i armëve për t’i dhënë një rol global Europës. Është ky propozimi i Rheinmetall – furnizuesit kryesor ndërkombëtar të sistemeve për industrinë e mbrojtjes dhe një nxitës i inovacioneve largpamëse në tregjet civile. Rheinmetall dha idenë e një konsorciumi europian të armëve për të konkurruar më mirë me rivalët amerikanë, ndërsa grupi gjerman i mbrojtjes shpalosi ambiciet e tij globale në një industri në lulëzim.

Kompania, një përfituese kryesore e rritjes së shpenzimeve të mbrojtjes që nga pushtimi i plotë i Ukrainës nga Rusia në vitin 2022, parashikon të ardhura rekord prej më shumë se 10 miliardë euro këtë vit, ndërsa libri i saj i porosive të arrijë në 60 miliardë euro.

CEO i kompanisë u shpreh se objektivi është transformimi në një lojtar në mbarë botën dhe aktualisht kjo mund të bëhet vetëm falë fluksit të mirë të parave. Ai tha se Rheinmetall do të përpiqet të vazhdojë me blerjet në Shtetet e Bashkuara, por gjithashtu sugjeroi krijimin e një ‘konsorciumi të madh’ të kompanive europiane të mbrojtjes. Ai sqaroi se do të kishte kuptim të themelohej një strehë e sistemit europian që ka një qarkullim prej rreth 30, 35 miliardë euro, në mënyrë që mund të konkurrohet me amerikanët. Kjo, sipas tij, është padyshim e mundur.

Ai tha se lojtarë të tjerë të mëdhenj në Europë përfshinin Leonardo, i cili ka një kapitalizim tregu dukshëm më të ulët se Rheinmetall, dhe KNDS nga Franca, por nuk dha asnjë tregues për ndonjë bisedë për të krijuar një konsorcium të mundshëm.

Duke u futur në Shtetet e Bashkuara, besohet se Rheinmetall ka një shans të mirë për të fituar një kontratë për të zhvilluar një pasardhës të mjetit luftarak Bradley në një projekt që mund të vlejë më shumë se 45 miliardë dollarë.

Por pjesa më e madhe e porosive për pajisjen e ushtrisë gjermane me automjete të reja luftarake do të shkonte në Finlandë, ku kompania e mbrojtjes Patria po udhëheq zhvillimin e një automjeti të blinduar 6×6 që do të përdoret gjithashtu nga Finlanda, Suedia dhe Letonia.

Qeveria e kancelarit gjerman Olaf Scholz krijoi një fond mbrojtjeje speciale prej 100 miliardë eurosh në vitin 2022, në atë që e përshkroi si një pikë kthese për të rritur shpenzimet e saj ushtarake pas sulmit të Rusisë në Ukrainë. Megjithatë, duhen 30 miliardë euro shtesë në vit. Rheinmetall aktualisht po punon me më shumë fitim dhe parashikohet se vlera e tij e tregut mund të rritet në rreth 50 miliardë euro nga 22 miliardë tani.

Dorina Kurtaj /SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.