“Diaspora, të investojë në Shqipëri” – Ministri Gonxhja: Ofrojmë programe për sipërmarrjet. Të zhvillojmë potencialet tona

Diaspora shqiptare ka shumë sipërmarrës të sukseshëm dhe nxitja e këtyre të fundit për të bashkëpunuar dhe investuar në Shqipëri, shihet si tepër e rëndësishme për zhvillimin e mëtejshëm të sektorëve të caktuar të ekonomisë. Dhoma e Biznesit të Diasporës Shqiptare dhe Unioni i Sipërmarrësve të Rinj të Shqipërisë organizuan së fundmi ceremoninë e ndarjes së cmimeve “Bright Mind Albanian Worldwide”, me qëllim vlerësimin e sipërmarrësve, bizneseve dhe organizatave shqiptare nëpër botë.

Ministri i Ekonomisë, Kulturës dhe Inovacionit, Blendi Gonxhja, theksoi potencialin e bukurive të natyrës shqiptare për zhvillimin e turizmit dhe ftoi sipërmarrësit e diasporës shqiptare që të investojnë në Shqipëri përmes programeve që ministria ofron.

“Ne nuk ju duam vetëm të vini në Shqipëri dhe të shpenzoni paratë tuaja të fituara jashtë me mund, por duam të mësojmë prej jush dhe t’ju kemi sa më afër, prandaj programet me diasporën dhe këto takime, janë një mënyrë e të ftuarit të diasporës, sic janë edhe  paketa e re e maleve apo investo në tokën tënde, për pjesën e maleve ose një turizmi që ne duam të jetë më shumë se sezonal, por të jetë për të gjithë vitin dhe të ketë një zhvillim të mrekullive të paeksploruara të Shqipërisë duke ndërthurur infrastrukturën, tekonologjinë me natyrën, gjithmonë duke mbrojtur këtë të fundit.

Në këtë aspekt, programet për diasporën do të vijojnë, duam të ndihmojmë qendrat kulturore dhe ekonomike apo të shkëmbimeve të ndryshme, ku ne në një shtëpi do të jemi edhe shqiptarë nga Shqipëria, Kosova dhe e gjithë diaspora, por duke i ulur kostot tona dhe duke gjeneruar sa më shumë ndërveprim në këto pika, qytete të mëdha nga vini, ku diaspora jonë punon dhe jeton. Qëllimi është të ofrojmë një alternativë që për fëmijët, të afërmit, ortakët tuaj mund të jetë alternativa e jetës për të investuar në Shqiupëri dhe këtu duhet të jemi shumë aktivë me qëllim që t’ju japim paketa investimi dhe për të qenë prezent në Shqipëri edhe në mënyrë virtuale, digjitale apo në mënyrën e investimeve me kompanitë ose degët e kompanive tuaja dhe së shpejti urojmë që të kemi prezencën tuaj edhe në parqet e reja teknologjiike TEDA Tirana apo Durana Tech Park në Durrës, të cilat do të jenë zona për ide të reja dhe investime.”

Çmimet “Bright Mind Albanian Worldwide” bashkuan mendjet më të mira dhe të ndritura në sipërmarrje, duke ofruar një platformë për të shfaqur suksesin, inovacionin dhe përsosmërinë brenda diasporës shqiptare.

Ledina Elezi/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.