Preferohen pronat në periferi të qyteteve – Pasuritë e paluajtshme shiten më shpejt në Tiranë
Shitjet e pronave pësuan një rritje të lehtë gjatë vitit të shkuar, megjithëse numri i subjekteve që kanë kryer shitje ishte më i ulët krahasuar me vitin paraardhës. Sipas të dhënave nga vrojtimi i Bankës së Shqipërisë mbi tregun e pasurive të paluajtshme, numri i përgjithshëm i pronave të shitura ishte 1150 në gjysmën e parë të vitit 2023 nga 933 të periudhës paraardhëse, ndërsa vetëm 79 subjekte kishin kryer shitje nga 90 që kanë qenë gjithsej.
Për rrjedhojë, numri mesatar i pronave të shitura nga çdo agjenci imobiliare gjatë gjashtëmujorit të parë të vitit 2023 rezultoi në rreth 6.7, duke u rritur nga mesatarja prej 5 e raportuar gjatë gjysmës së dytë të vitit 2022.
Sipas Bankës Qendrore, si rezultat i çmimeve më të ulëta, shtetasit kanë blerë më tepër prona në periferi të qyteteve. Konkretisht, rreth 32% e shitjeve të realizuara gjatë gjysmës së parë të vitit të shkuar në të gjithë territorin përfaqësohen nga prona të vendosura në zonat më të preferuara brenda qytetit, nga 45% gjatë periudhës paraardhëse. Rreth 52% e pronave të shitura kanë qenë të ndërtuara në periferi të qyteteve, nga 45% në periudhën e kaluar dhe 16% e pronave kanë qenë prona të ndërtuara jashtë qytetit, nga 10% të gjashtëmujorit të mëparshëm.
Në pjesën më të madhe të rasteve, çmimi i blerjes së pronës për shitjet e kryera ka qenë i njëjtë me çmimin e kërkuar nga shitësi. Koha mesatare e shitjes së banesave në rang vendi për gjysmën e parë të vitit të shkuar raportohet të jetë mesatarisht 10.6 muaj. Në rastin e Tiranës nuk shfaqen ndryshime të mëdha, ndërsa qytetet bregdetare si Durrësi, Vlora, Saranda dhe të tjerat kanë raportuar kohëzgjatje më të lartë shitjeje se periudhën e kaluar. Në gjashtëmujorin e dytë të 2023-it, koha e shitjes për zonën e Tiranës është shkurtuar me 2 muaj, ndërsa ajo për zonat bregdetare dhe për zonat e tjera paraqitet e lartë.
Oferta për prona të paluajtshme ka ecur paralelisht me numrin e lejeve të ndërtimit. Duke marrë në konsideratë ritmin e shpejtë të ndërtimeve të reja vitet e fundit, oferta për prona të paluajtshme ka vijuar të rritet ngjashëm me atë të periudhave të kaluara. Në këto dy vite, pritet që tregu i pasurive të paluajtshme të ketë një ecuri pozitive, si për sa i takon çmimeve ashtu dhe për numrin e pronave të shitura.
Ledina Elezi/SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.