Pse të huajt zgjedhin Shqipërinë për të blerë prona? – Sipërmarrësja Oksana Genkina: Janë çmime të lira në raport me rajonin

Kërkesa gjithnjë e në rritje, veçanërisht nga të huajt do të sjellë shtrenjtim të mëtejshëm të çmimeve të apartamenteve. Oksana Genkina, sipërmarrëse thotë se interesi nga të huajt për të blerë prona në Shqipëri është rritur ndjeshëm.

Kjo për disa arsye, duke veçuar çmimet më të favorshme në raport me vendet e rajonit, taksat e ulta dhe perspektivën që ka ky treg në të ardhmen.

Nga studio e emisionit “Box to Box” Genkina u ndal edhe tek situata aktuale. Sipas saj në 6 muajt e fundit ka një stabilitet apo qendrueshmëri të çmimeve, por ajo që ka ndodhur është se janë rritur ndjeshëm çmimet e qirave.

Tregu i pasurive të paluajtshme ka njohur një rritje të vrullshme përgjatë viteve të fundit. Për shkak të rregullimeve ligjore të bëra ndër vite, shton Genkina apartamentet tani janë më cilësore dhe më të sigurta, gjë që ka rritur kërkesën për rrjedhojë edhe ofertën.

Zonat në kryeqytet të cilat ofrojnë një çmim më të volitshëm aktualisht, janë periferia, apo kurora e Tiranës, ku një metër kator shkon 1 mijë euro.

Ndërsa në qendër niveli i çmimeve përcaktohet nga disa komponentë, duke veçuar këtu edhe “moshën” e godinës. Në këto raste, pra kur godina është disavjeçare aplikohet 1 për qind zbritje për çdo vit amortizim, një skemë kjo që ka nxitur edhe shitjen e tyre.

Ada Hazizolli/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.