Mbyllet fusha më e madhe e gazit në Europë – Holanda përpiqet të shmangë tërmetet

Holanda mbylli zyrtarisht fushën e gazit të Groningenit pasi autoritetet miratuan një pezullim të përhershëm të operacioneve të shpimit në vend për të kufizuar rreziqet sizmike në rajonin verior.

Që nga tetori 2023, fusha e gazit prodhon vetëm një pjesë të kapacitetit të saj të plotë pas disa vitesh reduktim të prodhimit, në mënyrë që të zvogëlohet rreziku i tërmeteve të shkaktuara nga procesi në rajon, të cilët kanë dëmtuar mijëra ndërtesa gjatë viteve.

Megjithatë, 11 “rezervuarët” e saj mbeten hapur në rast të një dimri të ashpër dhe për shkak të situatës së pasigurtë ndërkombëtare lidhur me konfliktin mes Rusisë dhe Ukrainës. Pak ditë më parë, senati holandez miratoi një ligj për mbylljen e përhershme të fushës së gazit, pasi qeveria premtoi se prodhimi nuk do të rifillonte kurrë për të kufizuar rreziqet sizmike në rajon.

Ky veprim zemëroi qeverinë dhe zyrtarët lokalë në provincën veriore. Ministri i Minierave Hans Vijlbrief, i cili bëri presion për mbylljen, tha se do të jepte dorëheqjen nëse kjo do të çonte në vonesa të gjata dhe pasiguri të mëtejshme në lidhje me rreziqet e tërmeteve për njerëzit që jetojnë në rajon. Autoritetet e Groningenit kanë akuzuar parlamentin se ka refuzuar një premtim për t’i dhënë fund shpimit të gazit.

Fusha më e madhe e gazit në Europë u hap në vitin 1963, ajo është bërë një kontribues i madh në ekonominë holandeze dhe ende ka rezerva të mëdha gazi. Ajo prodhoi më shumë se 50 miliardë metra kub gaz në kulmin e saj dhjetë vjet më parë.

Megjithatë, rajoni ka regjistruar më shumë se 1.600 tërmete që nga viti 1986, duke dëmtuar 85.000 ndërtesa. Nuk është e qartë nëse mbyllja e prodhimit është e mjaftueshme për të parandaluar aktivitetin sizmik në rajon, pasi kavitetet boshe mbeten nën tokë.

Në shkurt, sipërmarrja e përbashkët midis Shell dhe Exxon, e cila operon fushën e Groningenit, kërkoi nga një gjykatë arbitrazhi të vendosë nëse qeveria duhet të japë kompensim për mbylljen e prodhimit të gazit. Fitimi i Holandës nga gazi ka sjellë 363 miliardë euro që nga fillimi i prodhimit, ndërsa fitimet e “Shell” dhe “Exxon” nga Groningeni arritën në pothuajse 66 miliardë euro në të njëjtën periudhë.

Para nisjes së Operacionit Special Ushtarak në Ukrainë, një e katërta e importeve të gazit holandez vinte nga Rusia, sipas agjencisë së statistikave të vendit. Në vitin 2023, pjesa e gazit natyror rus përbënte më pak se 9 % të importeve të vendit. Ndërkohë, gazi natyror i lëngshëm nga SHBA u rrit në dy të tretat e importeve të gazit të vendit vitin e kaluar.

Dorina Kurtaj /SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.