Nis Panairi i Punës dhe Aftësive/ Rama: Janë 13 mijë të punësuar më shumë se sa në marsin e vitit 2021!

Rreth 1500 vende të lira pune ofrohen nga 63 biznese, si në Hoteleri – Turizëm dhe Agroturizëm, Industri përpunuese, konfeksione; ICT & Komunikacion Shërbime financiare dhe sigurime; Qendra trajnimi Private – Hoteleri, etj në panairin e punës dhe aftësive që është çelur në Durrës. Ndërkohë, që në hapësirën jashtë këtij panairi, nga Drejtoria Rajonale e Punësimit këtu në Durrës, janë dhe 600 vende të tjera të lira të vëna në dispozicion të të gjithë atyre që kërkojnë të punësohen.

Rama tha se së pari, në mars të vitit 2022, e këto nuk janë anketime, këto janë statistika të nxjerra nga regjistri i punës në Republikën e Shqipërisë, pra janë të dhëna që janë gjeneruar nga regjistri ku janë të gjithë të punësuarit si taksapagues apo si kontribuues në skemën e sigurimeve shoqërore dhe shëndetësore, e janë 13 mijë të punësuar më shumë se sa në marsin e vitit 2021, ky është fakt. Sipas tij ashtu sikundër, është fakt që në 4 mujorin e parë të këtij viti falë dhe gjithë përpjekjes së bërë në bashkëpunim dhe në mirëkuptim me biznesin, për korrektimin e pagave, sot kemi një pagë mesatare të rritur me 8%.

Gjatë fjalës së tij, kryeministri u ndal edhe në rritjen e pagave për punonjësit. “Në Shqipëri pagat vazhdojnë të rriten në mënyrë të qëndrueshme, edhe pse ende duhet të jenë shumë më të larta, kjo nuk ka pikë diskutimi, por nga ana tjetër në Shqipëri sot, sa më shumë ke për të ofruar në aspektin teknik dhe profesional, aq më të lartë e ke mundësinë e pagës. Mjafton të shohim se çfarë nevoje të madhe ka tregu sot për krah pune të kualifikuar në sektorin e teknologjisë digjitale, në sektorin e informatikës, sa nevojë ka sot në të gjithë sektorët horizontalisht për teknikë, për njerëz që mund të mos e kenë mbaruar universitetin, por që kanë aftësi të caktuara profesionale për të kuptuar se shanset e punësimit dhe mundësisë për të pasur një pagë e cila rritet vijimisht sipas rritjes së aftësive të tua në vendin tonë, janë duke u zgjeruar”, tha ai.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.