“OK” fondeve europiane të investimeve – AMF publikon për konsultim rregulloren: Do marketojnë e shesin aksionet nëpërmjet bankave

Pak ditë pasi kreu i AMF Ervin Mete foli për interesin që po tregojnë dy fonde investimi evropiane për t’u shtrirë në Shqipëri, Autoriteti ka nxjerrë për konsultim publik një rregullore mbi licencimin dhe funksionimin e sipërmarrjes të investimeve kolektive me ofertë publike.

Rregullorja specifikon se behet fjalë për fonde investimesh të licencuara në një vend anëtar apo degëve të tyre të licencuara gjithashtu në Bashkimin Europian.

Rregullorja përcakton se Shoqëria administruese apo dega e licencuar në një vend anëtar të BE-së, mund të marketojë dhe shesë aksionet ose kuotat e sipërmarrjes së investimeve kolektive me ofertë publike në Republikën e Shqipërisë, vetëm pas njohjes nga Autoriteti i Mbikëqyrjes Financiare.

Ndërkaq, ato mund të marketojnë dhe shesin kuotat e sipërmarrjes së investimeve kolektive me ofertë publike nëpërmjet bankave të licencuara si agjent shitje.

Fondeve të investimeve do u jepet licenca për të vepruar në Shqipëri vetëm pas një ekzaminimi të hollësishëm të financave dhe aktivitetit të tyre, në bashkëpunim me autoritetet e vendeve ku ata operojnë. Në një kohë që Gjatë periudhës së shqyrtimit, AMF i jep vetes të drejtën të kërkojë çdo informacion të mëtejshëm që është i nevojshëm për të gjykuar mbi plotësimin e kritereve nga subjekti kërkues.

Fondet do të kenë gjithashtu edhe detyrimin të bëjnë transparente produktet e tyre në gjuhën shqipe për investitorët shqiptarë.

Rregullorja përcakton se Shoqëria administruese informon Autoritetin nëse ka ndryshime lidhur me: emërimin dhe shkarkimin e personave kyç dhe personelit kyç; fillimin ose ndërprerjen e planifikuar të veprimtarive;  marketimin; dhe kontratat e lidhura me agjentët e shitjeve.

Ndërkohë që Autoriteti i Mbikëqyrjes Financiare gëzon të drejtën të revokojë licencën nëse Fondi nuk respekton kriteret ligjore, apo qoftë edhe se shkel detyrimin për transparencë ndaj investitorëve.

Lorenc Rabeta / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.