Pagat dhe konsumi mbushin arkën e shtetit – 6-mujori, 227 milionë euro shtesë në buxhet
Buxheti i shtetit ka arkëtuar 342.8 miliardë lekë në gjysmën e parë të viti, apo 102.5% e planit të së njëjtës periudhë. Referuar të dhënave paraprake fiskale të Ministrisë së Financave, krahasuar me 6 mujorin 2023, janë mbledhur rreth 22.85 miliardë lekë apo 227 milionë euro më shumë.
Të ardhurat doganore (të ardhurat nga TVSH në import, akciza, taksa doganore dhe renta minerare) u realizuan në vlerën 109.9 miliardë lekë, me një rritje prej 7.1 miliardë lekësh krahasimisht me 6 mujorin 2023, duke tejkaluar planin për periudhën me 0.1%. Pavarësisht efekteve të kursit të këmbimit rritja e kërkesës për mallra ka bërë që peshën kryesore ta kenë të ardhurat nga TVSH në import, të cilat rezultojnë 75.3 miliardë lekë, apo 4.5 miliardë lekë shumë se e njëjta periudhë e një viti më pare. Ndonëse në raport me planin regjistrohen në 0.7% më pak .
Të ardhurat nga akciza janë realizuar në masën 28.9 miliardë lekë, me rritje rreth 2.5 miliardë lekë nga viti i kaluar.
Të ardhurat nga renta minerare në eksport janë realizuar në vlerën 1.9 miliardë lekë afro 2.8% më pak krahasuar me të njëjtën periudhë të vitit të kaluar.
Tatimet udhëheqin këtë performancë, duke arkëtuar 187.5 miliardë lekë, apo 19.8 miliardë lekë më shumë se 6-mujori i vitit të kaluar. Po ashtu, administrata tatimore ka tejkaluar planin me 5.1 miliardë lekë.
Kontributin më të lartë e kanë të ardhurat mbledhura nga kontributet për sigurimet shoqërore dhe shëndetësore, të cilat realizuan në masën 75.3 miliardë lekë, 9.1 miliardë lekë ose 13.7% më shumë se 6-mujori 2023, si dhe realizim 102.5 % të planit për 6-mujorin 2024. Kjo performancë vjen si rrjedhojë e rritjes së pagave në sektorin publik dhe të rritjes së pagës minimale në shkallë vendi.
Të ardhurat nga TVSH e arkëtuar (neto), u realizuan në masën 27.5 miliardë lekë, 5.2 miliardë lek ose 23.1% më shumë se 6-mujori 2023, çka reflektojnë rritjen e konsumit në vend.
Tatimi mbi fitimin vijon të jetë më rënie me 3.6% në raport me 6-mujori 2023, për shkak të efektit të taksës së jashtëzakonshme të energjisë që u mblodh vitin e kaluar.
Tatimi mbi të ardhurat personale është arkëtuar në vlerën 32.2 miliardë lekë, 16% më shumë se 6-mujori 2023.
Taksat nacionale, rezultojnë me 13.2% më shumë se 6-mujori 2023.
Shpenzimet e përgjithshme publike, për periudhën 6 mujore të vitit 2024, arritën në rreth 291.4 miliardë lekë me një realizim në masën 93.1 përqind të planit të periudhës.
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.