Pagesat elektronike, BSH: rritje e shpejtë në vitet e fundit – Në 2023 u kryen 21 pagesa elektronike për frymë, tejkalohet parashikimi

Vitin e kaluar në vendin tonë janë kryer mesatarisht 21 pagesa elektronike për frymë. Sipas shifrave të Bankës së Shqipërisë rritja ka ardhur me ritme më të shpejta nga se ishte parashikuar. Në vitin 2022, numri i pagesave elektronike kishte qenë 17 për frymë, ndërsa në 2020, pagesat elektronike ishin mesatarisht vetëm 9 për frymë.

Krahasuar me një dekadë më parë, ky tregues është rritur me pothuajse 10 herë. Strategjia Kombëtare e Pagesave me Vlerë të Vogël 2018-2023 kishte vendosur si objektiv që pagesat elektronike të arrinin në 10 për frymë brenda vitit 2023, por rritja ka qenë e shpejtë dhe përdorimi mesatar i pagesave elektronike është ka rezultuar më shumë se dy herë më i lartë, krahasuar me objektivin e vendosur.

Pagesat elektronike përfshijnë të gjitha pagesat e kryera e kryera nëpërmjet kanaleve elektronike të pagesave të ofruara nga sektori financiar dhe përfshijnë kryesisht veprimet me kartë pagese dhe transaksionet e kryera nëpërmjet internet banking dhe mobile banking.

Vlerësohet se përfshirja financiare e shqiptarëve është rritur ndjeshëm dhe rreth 70% e popullsisë zotëron një llogari pagesash, nga 40% që ishte ky tregues një dekadë më parë. Sipas statistikave të Bankës së Shqipërisë, numri total i veprimeve bankare të internet banking vitin e kaluar arriti në 7.67 milionë, niveli më i lartë i regjistruar ndonjëherë.

SCAN

 

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.