Pasuria e gjeneratës së re të miliarderëve – Pjesa më e madhe e trashëgojnë, nuk punojnë për ta pasur

Gjenerata e ardhshme e miliarderëve mbledh më shumë pasuri nga trashëgimia sesa nga puna, sipas UBS. Banka zvicerane e favorizuar nga super të pasurit thotë se 1000 miliarderë ka të ngjarë të kalojnë 5.2 trilion dollarë për fëmijët e tyre gjatë 20 viteve të ardhshme. Pra miliarderët e sapokrijuar kanë mbledhur më shumë nga pasuria e tyre nga vdekja e të afërmve sesa nga puna dhe sipërmarrja e tyre.

Nga 137 personat që u bënë miliarderë në 12 muajt deri në këtë prill, 53 trashëguan një total prej 150.8 miliardë dollarësh nga familja e tyre, zbuloi raporti i UBS. Kjo tejkalon 140.7 miliardë dollarët e kombinuar të krijuar nga “84 miliarderë të rinj të vetë-bërë” gjatë së njëjtës periudhë.

Banka tha se ishte hera e parë në historinë nëntëvjeçare të raportit të saj vjetor mbi pasurinë e 0.00004% më të pasur të shoqërisë që gjenerata e ardhshme e miliarderëve grumbulloi më shumë pasuri përmes trashëgimisë sesa sipërmarrjes.

Raporti shpjegon se rëndësia në rritje e këtyre familjeve mund të shihet në të gjitha rajonet kryesore gjeografike. Në Azi-Paqësor, pasuria mesatare e trashëgimtarëve ishte 2 miliardë dollarë krahasuar me 1.6 miliardë dollarë për sipërmarrësit. Në Amerikë, trashëgimtarët kishin vlerë 2.2 miliardë dollarë kundrejt 1.5 miliardë dollarëve të sipërmarrësve. Në Europë, Lindjen e Mesme dhe Afrikë, pasuria mesatare e trashëgimtarëve është 4.4 miliardë dollarë – dyfishi i 2.2 miliardë dollarëve të sipërmarrësve.

Të dhënat e raportit publikohen në një moment kur ka një debat publik në rritje për rolin e taksës së trashëgimisë në ndihmën për të paguar shërbimet publike dhe për të ndihmuar familjet që luftojnë për të përballuar krizën e kostos së jetesës.

Në përgjithësi, numri i miliarderëve në mbarë botën u rrit me 7% në 2.544, dhe pasuria e tyre e kombinuar u rrit me 9% në 12 trilion dollarë, tha UBS. Kjo është rreth katër herë më shumë se PBB-ja e Mbretërisë së Bashkuar. Raporti tha se pasuria e madhe tashmë e transferuar te gjenerata e ardhshme ishte “vetëm maja e ajsbergut”.

Gjatë 20 deri në 30 viteve të ardhshme, mbi 1000 nga miliarderët e sotëm ka të ngjarë të transferojnë më shumë se 5.2 trilion dollarë tek trashëgimtarët e tyre. Si ta llogarisim këtë numër? Thjesht duke mbledhur pasurinë e 1023 miliarderëve që sot janë 70 vjeç e lart. Duke parë në terma afatgjatë, pasuria e jashtëzakonshme që rezulton nga lulëzimi i aktivitetit sipërmarrës që nga vitet 1990 ka krijuar një themel për brezat e ardhshëm të familjeve miliardere.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.