Paundi dhe Euro ringrihen nga nivelet minimale – Banka e Anglisë njofton blerje të palimituara të obligacioneve, deri më 14 tetor

Paundi britanik ka rikuperuar një pjesë të humbjeve, gjatë sesionit të sotëm, pasi Banka e Anglisë njoftoi blerje të palimituara të obligacioneve në tregjet dytësore për të stabilizuar tregjet e monedhave dhe tregjet financiare, pas planit radikal të qeverisë për uljen e taksave.

Monedha britanike realizoi fitimet më të mëdha ditore që nga mesi i qershorit, duke tërhequr edhe euron me vete. Banka e Anglisë bleu rreth 1 miliardë paund obligacione dhe njoftoi se do të blerë sasi të pakufizuara deri në 14 tetor. Për rrjedhojë, gjatë sesionit aziatik paundi u rrit me rreth 1.4% në mbi 1.08 dollarë, ndërsa euro fitoi rreth 1.5% të vlerës, në mbi 0.97 dollarë.

Të premten e javës së kaluar, paundi ra në 1.0327 dollarë, niveli më i ulët në histori, pasi investitorët reaguan ndaj planit të qeverisë për të ulur taksat dhe për të ofruar subvencione për investimet.

Gjithsesi, analistët shprehen se blerja e obligacioneve të qeverisë nga Banka e Anglisë mund të ndikojë në uljen e kostove të borxhit por nuk do të zgjidhe tensionet mes stimujve fiskale dhe shtrëngimit të politikës monetare.

Ndërkohë, indeksi që mat ecurinë e dollarit amerikan, përballë shportës me 6 monedhat kryesore ndërkombëtare po qëndron në rreth 113, shumë pranë nivelit më të lartë në 2 dekadat e fundit. Në tregun e kriptomonedhave, bitcoin vijon të tregtohet në mbi 19 mijë dollarë, ndërsa ethereum po tregtohet në rreth 1300 dollarë.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.