Për herë të parë “fundoset” importi i drithërave – Shifra më e ulët në 5 vite në sasi dhe në vlerë
Gjatë viti që lamë pas, lufta Rusi-Ukraine nxori në pah varësinë që ka Shqipëria nga importi i drithërave, gjë që u reflektua dhe në luhatjen e fortë të çmimeve në treg, e cila rëndoi mbi xhepat e qytetarëve shqiptarë. Por duket se ky vit ka bërë një kthesë të fortë në këtë drejtim.
Referuar të dhënave të detajuara nga Drejtoria e Përgjithshme e Doganave, të analizuara nga SCAN TV, vihet re një rënie e ndjeshme e importeve të drithërave në sasi dhe në vlerë. Konkretisht, sa i takon sasisë së importuar, rënia ka pasur luhatje nga viti në vit, ku përgjatë Janar-Prill 2023 rezulton të jenë blerë nga jashtë kufijve rreth 59.3 mijë ton drithëra, shifra më e ulët në 5 vitet e fundit dhe thuajse e përgjysmuar në raport me vitin 2019.
Po ashtu, edhe në vlerë, 4-mujori i parë i këtij viti regjistrohet në shifrën më të ulët të 5 viteve të fundit, e llogaritur në 2.8 miliardë lekë, ndërsa shifra më e lartë si në sasi dhe në vlerë regjistrohet në vitin 2020 që përkon edhe me pandeminë Covid 2019, ku janë importuar 4.6 miliardë lekë drithëra. Ndikim në rënien e importeve duket se ka dhënë fushata e ndërmarrë një vit më parë nga Ministria e Bujqësisë për të nxitur kultivimin e grurit në vend dukë ofruar mbështetje 30 mijë lekë për hektarë për sipërfaqe jo më pak se 1 hektarë.
Nga kjo fushatë u shpallën fitues 3127 fermerë. Me fondin e akorduar nga Ministria e Bujqësisë prej 500 milionë lekësh u synua, mbështetja e kultivimit të grurit për afro 16 660 hektarë tokë. Ministria e Bujqësisë synoi që sipërfaqja e kultivuar me grurë këtë vit të arrijë në 70.000 ha në total, duke u rritur me 31.2 për qind. Ndërsa një faktor tjetër lidhet me sasitë e importuara një vit më parë dhe rezervat që mund të kenë fabrikat.
Elisabeta Dosku/ SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.