Përmbytje masive në Holandë, Gjermani dhe Norvegji – Ekspertët: Më e keqja nuk ka ardhur ende!

Nivelet e lumenjtëve vazhduan të rriten në Holandë të mërkurën, duke shkaktuar përmbytje në disa pjesë të vendit.

Nivelet e larta të ujit në lumenjtë holandez do të shkaktojnë shqetësime në ditët në vijim, me ekspertët që parashikojnë se kulmi i përmbytjeve do të ndodhë më 28 dhjetor.

Në zonat e prekura, u ndërtuan prita të përkohshme me thasë të mëdhenj rëre për të kontrolluar rrjedhën e ujit. “Uji i lartë shkakton shqetësim në pjesë të ndryshme të vendit. Ne po monitorojmë nga afër situatën dhe po marrim masa aty ku është e nevojshme,” tha Mark Rutte, Kryeministri i Holandës më 26 dhjetor.

“I uroj shumë forcë të gjithëve në Holandë që po përballen me pasojat e pakëndshme të reshjeve të mëdha”.

Fermerët në Holandë kanë paralajmëruar se kushtet e këqija të motit mund të ndikojnë në korrjen e patateve dhe panxhar sheqerit.

Në Gjermaninë fqinje, disa stuhi radhazi nënkuptuan shira të dendur në tokë tashmë të lagur.

Situata në zonat e përmbytura në veri të vendit mbetet e pasigurt, ndonëse meteorologët thonë se kulmi është kaluar.

Pranë Bremenit, lumi Weser ka dalë nga brigjet e tij – disa shtëpi dhe ferma në buzë të qytetit-shtetit janë përmbytur.

Situata është po aq e rëndë edhe në Norvegji. Shumë qytete janë në gatishmëri pasi reshjet e dendura të borës i kanë lënë rrugët tejet të rrëshqitshme dhe të rrezikshme, duke shkaktuar disa aksidente trafiku dhe të lënduar.

Stuhia Henk parashikohet të godasë Irlandën dhe pjesën më të madhe të Britanisë së Madhe të shtunën, me mot ekstrem që shkon përtej Detit të Veriut dhe do të arrijë në Skandinavinë jugore të dielën në mëngjes.

​Edel Strazimiri / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.