Presidenti i Italisë shpërndan zyrtarisht parlamentin – Zgjedhjet e reja do të mbahen më 25 shtator!

Italia do të mbajë zgjedhje të përgjithshme këtë vjeshtë pasi presidenti Sergio Mattarella shpërndau zyrtarisht parlamentin. Vendimi erdhi pasi kryeministri Mario Draghi dorëzoi dorëheqjen e tij si rezultat i aleatëve kyç të koalicionit të krahut të djathtë që bojkotuan një votë besimi.

Draghi, një ekonomist dhe ish-president i Bankës Qendrore Europiane, do të vazhdojë të udhëheqë një qeveri të përkohshme. Zgjedhjet që do të zhvillohen më 25 shtator do të jenë të dytat në Itali në katër vjet.

“Qeveria ka dhënë dorëheqjen e saj […] Falënderova Mario Draghi dhe ministrat për angazhimin e tyre gjatë këtyre 18 muajve,” tha Mattarella të enjten në Pallatin Quirinale. “Qeveria po has kufizime në aktivitetet e saj, por ka mjetet për të vepruar në këto muaj para se të vijë ekzekutivi i ri”. “Ka shumë detyra për të përfunduar në interes të Italisë”, shtoi ai.

Qeveria e përkohshme e Draghit vendosi për datën e zgjedhjeve të përgjithshme menjëherë më pas, duke vendosur të dielën e fundit të shtatorit. Ndërsa ai nuk mund ta mbante të bashkuar koalicionin e tij të përçarë, Draghi dukej se kishte mbajtur një mbështetje të gjerë në mesin e publikut italian, shumë prej të cilëve iu lutën që të qëndronte.

Gazetat italiane të enjten ishin të bashkuara në zemërimin e tyre ndaj rezultatit surreal të dorëheqjes së tij dhe zgjedhjeve të parakohshme. Italia po pret të zbatojë programin e saj të rimëkëmbjes së pandemisë të financuar nga Bashkimi Europian në një kohë inflacioni dhe pasigurie ekonomike lidhur me luftën në Ukrainë.

Mattarella ka bërë thirrje që kriza politike të zgjidhet sa më shpejt që të jetë e mundur për të garantuar “bashkëpunimin gjithnjë e më të nevojshëm në nivel europian dhe ndërkombëtar”. “Shpresoj, edhe në tonin intensive dialektik të fushatës zgjedhore, për një kontribut konstruktiv në interesin më të mirë të Italisë.”

Edel Strazimiri / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.