Prodhuesit e automjeteve braktisin Gjermaninë – SHBA tërheq më shumë europianë falë subvencioneve

Me rastin e panairit të automjeteve në Shangai doli më shumë në pah shqetësimi i prodhuesve europianë dhe veçanërisht gjermanë për të transferuar bazën e prodhimit të makinave apo pjesëve nga selitë e tyre në SHBA. Arsyeja është një dhe ka të bëjë me dispozitat e legjislacionit të fundit të Biden për të subvencionuar ekonominë e gjelbër. Prodhuesit e automjeteve deklarojnë se dhe pse për momentin nuk planifikojmë të zhvendosim prodhimin në SHBA, fabrikat e ardhshme patjetër do të ndërtohen atje. Sipas tyre ekziston rreziku që Europa të jetë humbëse e ndryshimeve të ardhshme. Gjithnjë e më shumë prodhues automjetesh po tërheqin prodhimin nga Gjermania dhe po e transferojnë atë në Kinë dhe SHBA.

Arsyet për zhvendosjen e prodhimit në vende të tjera ndryshojnë. Një nga arsyet kryesore ka të bëjë me koston e lartë të energjisë në BE, e cila është dyfish ose trefish më e lartë në krahasim me atë të SHBA-së, ndërkohë që burokracitë ua vështirësojnë jetën prodhuesve gjermanë të automjeteve. Në një analizë të fundit nga Berylls thuhet se planet për të transferuar prodhimin jashtë nënkupton për BE-në tkurrje të numrit të planifikuar të automjeteve që do të prodhohen në periudhën 2023-2029. Megjithatë, kjo nuk vlen për rajonet e tjera të botës, ku pritet një rritje e prodhimit të automjeteve, por jo në nivelet e vitit 2021.

Një hendek prodhimi prej rreth 4 milionë automjetesh pritet midis Gjermanisë dhe Amerikës së Veriut në vitet e ardhshme.

Audi dhe Ford tashmë kanë njoftuar se do të nxisin prodhimin e automjeteve jashtë vendit, veçanërisht në SHBA, ku prodhuesve u paguhen subvencione bujare si pjesë e tranzicionit drejt elektrifikimit. Si rezultat, 100 mijë vende pune janë në rrezik në Gjermani. Në të njëjtën kohë, në procesin e dixhitalizimit të prodhimit, tendenca për të forcuar motorët alternativë është më se e qartë, pavarësisht se në SHBA kalimi nga motorët termikë në automjetet elektrike po ndodh me një ritëm shumë më të ngadaltë se në Europë dhe Kinë. Kështu, në Gjermani 14% e shitjeve të automjeteve të reja janë thjesht elektrike, në Kinë përqindja përkatëse është 21% dhe në SHBA është nën 6%. Megjithatë, këto të dhëna mund të ndryshojnë në të ardhmen e afërt, siç raporton Deutsche Welle.

SHBA dhe Europa aktualisht po konkurrojnë për vendin e dytë në renditjen e tregjeve kryesore të automjeteve elektrike në botë pas Kinës. Në SHBA, shitjet e automjeteve elektrike pritet të kalojnë gjashtë milionë njësi në vit deri në vitin 2030.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.