Pse Europa po kërkon më shumë litium nga Kanadaja?!

Në vizitën e saj në Kanada, Presidentja e Komisionit Europian, Ursula von der Leyen, iu drejtua parlamentit kanadez si pjesë e ofensivës së saj përtej Atlantikut. Qëllimi i saj është të promovojë bashkëpunimin në fusha të tilla si tranzicioni i energjisë, veprimi i klimës dhe mbështetja për Ukrainën.

Me pasojat nga lufta në Ukrainë të ndjera në të gjithë Bashkimin Europian, blloku po garon për t’i dhënë fund varësisë nga karburantet fosile nga Moska dhe për të rritur prodhimin e energjisë së rinovueshme në vend. Por Von der Leyen e di se do të kërkojë më shumë akses në mineralet kritike dhe lëndët e para si litiumi – që ka Kanadaja.

Si kryeministri kanadez Justin Trudeau ashtu edhe presidenti i Komisionit Europian ranë dakord të zhvillojnë tregtinë ndër-atlantike të hidrogjenit të gjelbër për të ndihmuar BE-në të përmbushë nevojat e saj për energji. “Bashkimi Europian po planifikon të prodhojë vetë 10 milionë tonë hidrogjen deri në vitin 2030, por gjithashtu të importojë 10 milionë tonë hidrogjen deri në vitin 2030”, tha von der Leyen.

Kanadaja është në fakt i vetmi vend në hemisferën veriore me të gjitha lëndët e para të nevojshme për prodhimin e baterive litium-jon. Në janar, von der Leyen paraqiti idenë e një “Klubi të lëndëve të para kritike”, të cilën ajo pritet ta ndjekë të premten me presidentin amerikan Joe Biden.

Justin Trudeau tha të martën se Kanadaja po zgjat misionin e saj për të trajnuar inxhinierë luftarakë dhe mjekë ukrainas deri në tetor. Trudeau premtoi gjithashtu 3 milionë dollarë kanadezë për përpjekjet e çminimit dhe u zotua me BE-në për të dërguar gjeneratorë në Ukrainë, e cila ka pësuar sulme të përsëritura në rrjetin e saj të energjisë që nga fillimi i pushtimit rus në shkallë të plotë një vit më parë. “Kanadaja do të qëndrojë krah për krah me popullin e Ukrainës për aq kohë sa duhet”, tha presidenti kanadez.

Otava ka dhënë më shumë se një miliard dollarë kanadezë në ndihmë ushtarake për Ukrainën gjatë vitit të kaluar, duke përfshirë tanke Leopard 2, automjete të tjera të blinduara, raketa tokë-ajër, obus dhe municione. Von der Leyen përshëndeti angazhimin e Otavës, ndërsa kujtoi se BE-ja ka shpenzuar më shumë se 12 miliardë euro për pajisje ushtarake për Ukrainën dhe synon të përfundojë trajnimin për rreth 30,000 trupa ukrainase deri në fund të vitit.

Von der Leyen ndodhet në një vizitë disaditore në Kanada. Më pas ajo do të udhëtojë për në Shtetet e Bashkuara ku do të pritet të premten nga presidenti Joe Biden.

Edel Strazimiri / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.