Pse Franca po anulon më shumë se 16 mijë fluturime për vitin 2024?!

Kontrolli francez i trafikut ajror aktualisht punon në një sistem të zhvilluar në vitet 1970 – ndonjëherë duke përdorur ende shirita letre për të përfaqësuar avionët në hyrje. Megjithëse është përmirësuar rregullisht gjatë viteve, ai është planifikuar për një riparim të madh në fillim të vitit 2024 për shkak të rritjes së shpejtë të trafikut ajror.

Me përditësimin e sistemit, dy muajt e parë të vitit mund të jenë të ndërlikuar për pasagjerët. Më shumë se 2.5 milionë fluturime kalojnë nëpër hapësirën ajrore franceze çdo vit dhe çdo ndërprerje mund të ndikojë në udhëtimet nëpër Europë.

Ndërsa puna po zhvillohet, vlerësohet se rreth 16,500 fluturime do të anulohen, sipas kanalit të lajmeve të biznesit BFM. Ndërmjet 9 janarit dhe 14 shkurtit, linjat ajrore janë këshilluar të shkurtojnë numrin e fluturimeve që ngrihen dhe zbarkojnë në aeroportet Charles de Gaulle, Orly, Le Bourget dhe Beauvais të Parisit me 20 %.

Gjatë kësaj periudhe, sistemi i ri do të testohet në qendrën e kontrollit të trafikut ajror në Athis-Mons, më e madhja në Francë e cila menaxhon të gjithë aeroportet në Paris dhe Beauvais. Cilat fluturime do të anulohen do t’u lihen linjave ajrore, por ato ka të ngjarë të kenë përparësi në rrugët në distanca të gjata.

Air France u tha mediave franceze se është “detyruar të anulojë disa fluturime të shkurtra dhe të mesme gjatë kësaj periudhe” – më shumë se 4,200 në total nga grupi Air France-KLM. Në përpjekje për të minimizuar ndikimin tek pasagjerët, grupi i linjave ajrore tashmë ka anuluar këto fluturime, ka informuar pasagjerët dhe u ka ofruar atyre transferime në fluturime të ndryshme në të njëjtën ditë.

Rreth 1 miliard euro po investohen në përmirësimin e kontrollit të trafikut ajror të Francës, në mënyrë që ajo të jetë në gjendje të trajtojë më shumë fluturime dhe të operojë në mënyrë më efikase. Përmirësimi në këtë “sistem të gjeneratës së re” është bërë “vendimtar”, tha për BFM Florian Guillermet, drejtor i Services de la Navigation Aérienne (DNSA).

Shkalla e operimit është kaq e madhe sepse gati 80 % e sistemit do të duhet të përmirësohet – shumë më tepër se praktika e zakonshme e ndryshimit të komponentëve njëri pas tjetrit.

Softueri i ri tashmë është implementuar në qendrat e kontrollit të trafikut ajror në Reims dhe Aix-en-Provence, por ende duhet të testohet në qendrën më të madhe në Athis-Mons. Gjatë kësaj periudhe gjashtë javore në fillim të vitit 2024, softueri do të testohet përpara se të prezantohet përfundimisht në nëntor.

Edel Strazimiri / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.