Prodhimi i karburanteve fosile tejkalon objektivat klimatike – Qeveritë planifikojnë të prodhojnë më shumë se dyfishin e sasisë së qymyrit

Qeveritë në botë planifikojnë të prodhojnë më shumë se dyfishin e sasisë së qymyrit, naftës dhe gazit deri në vitin 2030, sesa niveli që do të ishte në përputhje me frenimin e ngrohjes globale. Në këtë përfundim ka arritur një raport i Kombeve të Bashkuara dhe grupeve kërkimore në paralajmërimin mbi ndryshimin e klimës.

Disa nga prodhuesit më të mëdhenj të karburanteve fosile në botë, duke përfshirë Australinë, Kinën, Kanadanë dhe Shtetet e Bashkuara të Amerikës, janë ndër ata që po kryejnë zgjerime të mëdha në furnizimin me lëndë djegëse fosile.

Sipas Marrëveshjes së Parisit të 2015-ës, vendet janë zotuar për një objektiv afatgjatë për të kufizuar rritjen mesatare të temperaturës nën 2 gradë celsius mbi nivelet para-industriale dhe për të ndjekur përpjekjet për ta kufizuar atë edhe më tej në 1.5 C. Kjo kërkon që prodhimi i karburanteve fosile të ulet me rreth 6% në vit midis 2020-ës dhe 2030-ës.

Në vend të kësaj, vendet po planifikojnë dhe projektojnë një rritje mesatare vjetore prej 2%, e cila deri në vitin 2030 do të rezultonte në më shumë se dyfishin e prodhimit në përputhje me kufirin 1.5 gradë celsius, thuhet në raport.

Midis 2020-ës dhe 2030-ës, prodhimi global i qymyrit, naftës dhe gazit do të duhet të ulet çdo vit me 11%, 4% dhe 3% respektivisht për të qenë në përputhje me një objektiv prej 1.5 gradë celsius. Por, planet dhe projeksionet e qeverive tregojnë një rritje mesatare vjetore prej 2% për çdo karburant.

Në raport theksohet se ky hendek është i madh, me vendet që synojnë të prodhojnë 120 % më shumë lëndë djegëse fosile deri në vitin 2030 sesa do të ishte në përputhje me kufizimin e ngrohjes globale në 1.5 gradë celsius.

Presidenti amerikan Biden ka premtuar t’i japë fund subvencioneve të karburanteve fosile të SHBA me vlerë miliarda dollarë në vit, por ka të ngjarë të përballet me rezistencë nga ligjvënësit në një Kongres të ndarë, duke përfshirë edhe anëtarë të partisë së tij.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.