Pse vendet europiane po rrisin importin e gazit nga Azerbajxhani?!

Operatorët kombëtarë të sistemit të gazit të Bullgarisë, Rumanisë, Hungarisë dhe Sllovakisë ranë dakord të martën të nxisin transferimin e gazit natyror nga Azerbajxhani duke përdorur infrastrukturën ekzistuese të vendeve të tyre, të cilat deri vonë ishin shumë të varura nga energjia ruse.

Presidenti i Azerbajxhanit, Ilham Aliyev, e quajti nënshkrimin e marrëveshjes midis kombeve europiane dhe Kompanisë Shtetërore të Naftës të Republikës së Azerbajxhanit “një hap në kohë” që do të sillte furnizime më të mëdha dhe më të sigurta me gaz për shumë vende të tjera në Europë. Aliyev mori pjesë në ceremoninë e nënshkrimit në Sofje, kryeqyteti i Bullgarisë.

Pas pushtimit të Ukrainës nga Moska, Bashkimi Europian po përpiqet të diversifikojë burimet europiane të energjisë larg gazit rus. BE nënshkroi një memorandum mirëkuptimi me Azerbajxhanin në korrik për të dyfishuar vëllimin e importeve të gazit azerbajxhanas në 20 miliardë metra kub në vit deri në vitin 2027.

“Lufta në Ukrainë na shtyu të kërkojmë dimensione të reja të koncepteve të fqinjësisë së mirë, ndihmës reciproke dhe solidaritetit. Na ka shtyrë të kërkojmë zgjidhje krejtësisht të reja efikase, rrugë të reja dhe mënyra të reja furnizimi për të ripërpiluar hartën logjistike ndërkombëtare”, tha presidenti bullgar Rumen Radev.

Bullgaria është e lidhur me Korridorin Jugor të Gazit, një projekt tubacioni me shumë segmente për të marrë gazin natyror nga Azerbajxhani në Itali, përmes një ndërlidhësi me Greqinë. Lidhësi lejon dërgimin e 1 miliard metra kub gaz të Kaspikut në Bullgari, duke mbuluar gati një të tretën e nevojave të vendit dhe ka kapacitet për të rritur volumin deri në 5 miliardë metra kub në vit.

Edel Strazimiri / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.