Putin “shuan” shpresat për marrëveshjen e grurit – Pse ka rëndësi kjo për perëndimin dhe jo vetëm

Presidenti turk Rexhep Tajip Erdogan u takua me Vladimir Putin, duke shpresuar të bindë liderin rus që t’i bashkohet sërish një marrëveshjeje që lejon Ukrainën të eksportojë grurë në mënyrë të sigurtë. Moska u tërhoq nga marrëveshja në korrik. Por Putin e bëri të qartë se nisma nuk do të rikthehej tani. Putini shuajti shpresat për një ringjallje të nismës së grurit, duke thënë se Perëndimi duhet së pari të përmbushë kërkesat e tij për lehtësimin e eksporteve bujqësore ruse. Perëndimi i ka hedhur poshtë ato ankesa më parë dhe ka thënë se nuk ka asgjë që i ndalon ato eksporte. Gjithnjë e më shumë anije mallrash nga Ukraina përdorin një korridor civil pavarësisht kërcënimeve ruse.

Kremlini refuzoi të rinovojë marrëveshjen e grurit kur ajo përfundoi në korrik, duke pretenduar se një marrëveshje paralele që premtonte heqjen e pengesave ndaj eksporteve ruse të ushqimit dhe plehrave nuk ishte respektuar. Moska u ankua se kufizimet në transportin dhe sigurimet penguan tregtinë e saj bujqësore, edhe pse ajo ka dërguar sasi rekord gruri që nga viti i kaluar. Disa kompani kanë qenë të kujdesshme për të bërë biznes me Rusinë për shkak të sanksioneve, megjithëse vendet perëndimore kanë dhënë garanci se eksportet ruse të ushqimit dhe plehrave janë të përjashtuara.

Marrëveshja origjinale – e ndërmjetësuar nga Kombet e Bashkuara dhe Turqia në korrik 2022 – lejoi që afro 36 milionë ton drithëra dhe mallra të tjera të largoheshin të sigurta nga tre porte të Ukrainës, pavarësisht luftës së Rusisë.

Që kur Putini u tërhoq nga nisma, Erdogan është zotuar vazhdimisht të rinovojë marrëveshjet që ndihmuan në shmangien e një krize ushqimore në pjesë të Afrikës, Lindjes së Mesme dhe Azisë. Ukraina dhe Rusia janë furnizuesit kryesorë të grurit, elbit, vajit të lulediellit dhe mallrave të tjera në të cilat mbështeten vendet në zhvillim.

Sekretari i Përgjithshëm i OKB-së António Guterres i dërgoi së fundmi ministrit të Jashtëm rus Sergej Lavrov “propozime konkrete” që synojnë të çojnë eksportet ruse në tregjet globale dhe të lejojnë rifillimin e nismës së Detit të Zi. Por Lavrov tha se Moska nuk ishte e kënaqur me këto propozime.

Dorina Kurtaj / SCAN

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.