Ujësjellësit, 2 shoqëri rajonale brenda vitit – Drejt finalizimit Vlora dhe Shkodra, mbetet vetëm bashkimi i Tiranës me Vorën e Kamzën

Krijimi i shoqërive rajonale të ujësjellës – kanalizime Vlorë dhe Shkodër parashikohet të përfundojë brenda këtij viti, sipas Agjencisë Kombëtare të Ujësjellës Kanalizime. Këto janë 2 nga 3 shoqëritë e fundit që nuk janë bashkuar ende sipas reformës që u ndërmor në sektor vitin që shkoi e që parashikon krijim e 15 shoqërive rajonale, nga 58 kompani ekzistuese.

Deri më tani janë krijuar 12 shoqëri rajonale, ndërkohë që me përfundimin e procesit në Vlorë e Shkodër, numri shkon në 14, duke mbetur vetëm ujësjellësi i Tiranës që do duhet të bashkohet me Kamzën dhe Vorën. Për t’u krijuar shoqëria rajonale është i nevojshëm miratimi nga Këshillat Bashkiakë, që për 3 shoqëritë e fundit ka hasur në pengesa për të arritur dakordësinë.

Ndërkaq, referuar hartës së miratuar ujësjellësi i Shkodrës do të bashkohet me Malësinë e Madhe, Pukën, Vaun e Dejës dhe Fushë-Arrëzin, ndërsa ujësjellësi i Vlorës do të bashkohet me Selenicën dhe Himarën. Në momentin që finalizohet bashkimi, bëhet edhe ndarja e 49% të aksioneve midis bashkive, ndërkohë që 51% e tyre i kalojnë Ministrisë së Infrastrukturës dhe Energjisë.

Referuar shoqërive të krijuara deri më tani, pjesën më të madhe të aksioneve e marrin bashkitë që janë qendra qarqesh, ndërsa më të voglat zotërojnë më pak aksione. Sipas qeverisë, reforma në sektor erdhi për shkak të performancës së dobët komerciale të ujësjëllësve, e kombinuar me nivele të larta të ujit pa të ardhura që arrijnë në 65.5%, ndërsa humbjet financiare dhe borxhet e kompanive janë të larta.

Ola Mitre / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.