Qiramarrësit në Greqi, të pasigurtë – Studimi/ Rritja e kostove të energjisë dhe qirasë, presion në rritje mbi familjet greke

Situata aktuale shkakton pasiguri, ankth dhe indinjatë tek shumica e qiramarrësve në Greqi. Energjia elektrike më e shtrenjtë, qiratë e larta dhe vështirësia për të gjetur banesë, po shfaqen tashmë si një problem madhor për një pjesë të madhe të shoqërisë. Për të adresuar problemin, shumica po kërkon rritje pagash dhe tavane të qirave.

Pikëpamjet e qiramarrësve për përkeqësimin e problemit të strehimit pasqyrohen në një anketë sasiore të kryer nga Eteron, Instituti për Kërkime dhe Ndryshime Sociale. Sondazhi u krye në një kampion prej 1000 personash vetëm një muaj e gjysmë më parë.

Rreth gjysma e qiramarrësve në Greqi thonë se ende e paguajnë qiranë e tyre pa shumë probleme. Pjesa tjetër shprehet se kanë vështirësi në një shkallë të vogël apo të madhe, me 2% që i detyrohen të paktën dy pagesa mujore pronarit. Për 12.3% të të anketuarve, qiraja është rritur ndjeshëm në 2 vitet e fundit.

Rritja e kostove të energjisë dhe qirasë po ushtron presion në rritje mbi familjet greke. 61,7% deklarojnë se pas pagesës së shpenzimeve të shtëpisë, paratë e mbetura mezi mjaftojnë për të mbuluar nevojat e tjera bazë. 15.2% e të anketuarve deklarojnë se marrin ndihmë financiare, ose hua nga palë të treta për të përballuar jetesën.

Situata aktuale me qiratë shkakton pasiguri në 28.7% të të anketuarve, ankth në 21.9%, indinjatë në 17.9%, zemërim në 9.8%.

Të anketuarit në sondazhin e Eteron përmendën rritjen e pagave dhe tavanin e qirasë si zgjidhje. Qeveria dhe pronarët e pronave konsiderohen si përgjegjës për problemin e strehimit. Zgjidhja për shumicën është rritja e pagave dhe vendosja e një tavani për qiratë, ndërsa një përqindje e konsiderueshme vlerëson se qiradhënësit duhet ti jepen stimuj tatimorë për të shitur pronën me një çmim më të ulët.

Hulumtimi i Institutit Eteron përfundon me një sërë propozimesh për trajtimin e krizës së strehimit, duke argumentuar se vetërregullimi i tregut nuk ka funksionuar.

SCAN

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.