Rama: Bashkëpunim për t’u zhvilluar – Ballkani i hapur, SHBA: të përfshihet Kosova, Vuçiç: ndihma për Shqipërinë!

Samiti i Ballkanit të Hapur ka hapur punimet këtë të mërkurë në Ohër me pjesëmarrjen e  Shqipërisë, Serbisë, Maqedonisë së Veriut, Malit të Zi, Bosnje Hercegovinës në Ohër dhe përfaqësues nga Europa dhe SHBA. Këtë samit kryeministri Rama e ka konsideruar si një mundësi më të mirë bashkëpunimi ndërmjet vendeve në kohë të vështira, ndërsa për mungesën  e Kosovës u shpreh  se e ardhmja është më e rëndësishme se e shkuara.

‘Sot jemi në teh thike, por jemi shumë më vulnerabël se shumë të tjerë, ndërkohë që në horizont është një dimër ku problemi nuk do të jetë çmimi i energjisë, por nuk do të ketë energjinë për ta blerë. Nuk kemi luksin të qëndrojmë me kurriz dhe të hapim defterët e konfliktit, ndërkohë që njerëzit duan energji 56.7 milionë euro është sot volumi i eksporteve mes 3 vendeve dhe këtu kam parasysh volumin e fermerëve shqiptarë në Serbi dhe Maqedoninë e Veriut. Vjet ishte 33.9. Dyfish, ose pothuajse. Fermerët tanë po shesin dhe po fitojnë. Serbia nuk ka hyrë në Ballkanin e Hapur për të humbur, por jemi të gjithë për të fituar me punë, bashkëpunim dhe liri lëvizje,’ tha Rama.

Duke e konsideruar si një iniciativë që smund të ndalet presidenti i Serbisë, Aleksandar Vuçiç njoftoi se takimi i ardhshëm do të jetë në Beograd. Ai shtoi se marrëdhëniet midis dy vendeve janë rritur teksa njoftoi dhe ndihmat që do japë për Shqipërinë.

Ai tha se ‘njerëzit nga Serbia po shkojnë në bregdetin shqiptar. Ne t’i ftojmë miqtë tanë që të vizitojnë Serbinë tonë të bukur. Jam krenar që nga iniciativa që e bëmë, këtë nuk mund të ndalojë askush. A do na hapen negociatat varen nga të tjerë jo nga ne.  Ne presim helikopterë plotësuar të specializuar për fikjen e zjarreve sepse presim verë të nxehtë dhe më pas të ndihmojmë miqtë tanë Maqedoninë dhe Shqipërinë.’

Në fjalën e tij kryeministri i Maqedonisë së Veriut Dimitar Kovaçevski njoftoi marrëveshjet që do të nënshkruhen në këtë samit.

“Për përmirësimin e konkurrencës, investimet e reja dhe zhvillim të bizneseve, për standard më të mirë të jetës nga i gjithë Ballkani. Ballkani i Hapur është një platformë që i duhet rajonit. Do ta lehtësojmë procesin për të krijuar një treg të vetëm të punës. Së pari duhet ta bëjmë që të rinjtë të qëndrojnë këtu, të mos ikin në botë. Sot hapim kapitull të ri në fushën e turizmin, Ballkani i Hapur të ofrohet si destinacion turistik me detet shumë të bukura falë Shqipërisë dhe liqenet e Maqedonisë e malet shumë të bukura. Sot kemi bashkëpunim edhe në fushën e kulturës për aktivitete që do të përmirësojë shkëmbimin kulturor. Shpresojmë të rriten festivalet. Shpresoj që më shumë serb dhe maqedonas ta vizitojnë Tiranën për vitin 2022. Në këtë samit do të nënshkruhet edhe marrëveshja për bashkëpunimin mes vendeve për lëvizjen e mallrave dhe njerëzve,” u shpreh ai.

I dërguari special i Shteteve të Bashkuara të Amerikës për Ballkanin Perëndimor, Gabriel Escobar, i pranishëm përmes një video mesazhi në samitin e sotëm të Ballkanit Perëndimor, kërkoi që edhe Kosova të bëhet pjesë e kësaj nisme. Escobar tha se kjo nismë që mbështetet nga SHBA duhet t’i përfshijë të gjashta shtetet.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.