Reduktohet prodhimi global i uraniumit – Rezervat e Kazakistanit ranë me 20% në gjysmën e parë të vitit

Kristi Ceta/SCAN

 

Kazakistani, prodhuesi numër një i uraniumit në botë, reduktoi planin e tij të prodhimit për vitin e ardhshëm mes vonesave të projektit dhe mungesës së acidit sulfurik të nevojshëm për të pompuar metalin radioaktiv nga toka.

Kompania shtetërore Kazatomprom ka njoftuar se do të prodhojë midis 25,000 dhe 26,500 tonë uranium vitin e ardhshëm, që paraqet një rënie në krahasim me vlerësimin e mëparshëm të prodhimit prej 30,500 deri në 31,500 tonë.

Çmimet e uraniumit janë më shumë se trefishuar gjatë katër viteve të fundit në pritje të një rritjeje të kërkesës për karburantin bërthamor. SHBA, Japonia dhe Franca ishin midis 22 vendeve që u zotuan në fund të vitit të kaluar për të trefishuar kapacitetin e energjisë bërthamore deri në vitin 2050.

Rezervat e Kazatomprom ranë 20%, në 6,132 ton në gjysmën e pare të vitit, por kompania u shpreh se ka ende një “nivel të rehatshëm të inventarëve” për të përmbushur angazhimet kontraktuale ekzistuese në 2025.

Ndërmarrja tha se planet e prodhimit dhe zhvillimit të minierave për vitin 2026 dhe më tej do të shpallen vetëm pas publikimit të rezultateve të ndërmjetme për 2025.

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.