Rekord shitje biletash të fluturimeve low cost në Itali – 20 milionë për më pak se 30 euro. Një nga destinacionet edhe Tirana

Epoka e fluturimeve me 0.99, 4.99 ose 9.99 euro, mund të ketë përfunduar disa vite më parë. Por dy nga tre fluturimet e Ryanair nga Bergamo në Dublin kushtojnë aktualisht 14.99 euro më 30 prill, e njëjta shifër kërkohet për Palermo-Milano Malpensa më 16 prill, pa përmendur linjën Bergamo-Tiranë, e cila më 20 prill kushton 10.99 euro me Wizz Air, ose Malpensa-London Gatwick që në 2 maj me EasyJet është në shitje për 18.49 euro. Të gjitha taksat janë të përfshira, ndërsa shërbimet shtesë si bagazh dore apo përzgjedhja e sediljeve janë të përjashtuara.

Në shtatë muajt nga prilli deri në tetor të këtij viti, linjat kryesore ajrore me kosto të ulët nxorën në shitje mbi 20 milionë vende për më pak se 30 euro secila për lidhjet brenda Italisë dhe ato me Europën, e barabartë me 40% të të gjithë ofertës së sediljeve të këtyre linjave ajrore.

Krahas ditëve që janë më të shtrenjta se mesatarja historike, ka momente në të cilat çmimet bien. Pjesërisht sepse kompanitë luftojnë për të mbushur avionët në ato momente specifike dhe pjesërisht sepse në disa rrugë kapaciteti i shpenzimeve të klientëve është i kufizuar.

Në periudhën nga 1 prilli deri më 31 tetor 2024, kompanitë me kosto të ulët nxorën në shitje pak më shumë se 50 milionë vende në fluturimet brenda Italisë dhe midis Italisë dhe Europës. Nga këto 20.6 milionë kushtojnë, maksimumi 29.99 euro. Më shumë se gjysma e vendeve me kosto të ulët ofrohen nga Ryanair.

Tarifat më të leverdishme mbeten ato larg momenteve klasike të pikut – për ata që udhëtojnë për pushime, për arsye familjare ose për punë – si të premteve, të dielave dhe të hënave.

Dorina Kurtaj /SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.