Rikthehen investimet e huaja në pasuritë e paluajtshme – Prill-Qershor, shtohen flukset nga Italia, Greqia e Gjermania. Bien ndjeshëm nga Turqia

Pas një rënie të ndjeshme në tremujorin e parë të vitit, investimet e huaja direkte kanë shënuar rritje gjatë periudhës prill-qershor, ndërkohë sektori i ndërtimit ka thithur një pjesë të konsiderueshme të tyre. Për tremujorin e dytë të këtij viti, fluksi i investimeve të huaja direkte raportohet nga Banka e Shqipërisë në vlerën 378.59 milionë euro. Në tremujorin e parë të vitit ato ishin në total 307.29, me një shtesë prej më shumë se 70 milionë eurosh për tre muajt e dytë të vitit. Gjithsesi, vlerat mbeten më të ulëta se në tremujorin e fundit të vitit 2022, kur raporti total ishte 388.27 milionë lekë.

Fluksi i investimeve të huaja në aktivitetin e pasurive të paluajtshme është edhe përgjegjësi kryesor për këtë rritje. Banka e Shqipërisë raporton se nga 48.81 milionë euro në tremujorin e parë, invesimet e huaja direkte në këtë sektor kanë “kërcyer” në 78.15 milionë euro për tremujorin e dytë. Ndërkaq, po sipas Bankës së Shqipërisë, flukset shumë të larta të investimeve të huaja direkte në tregun e pasurive të paluajtshme janë aktualisht edhe një prej faktorëve të nënçmimit të monedhës europianë. Megjithëse në rënie krahasuar me tremujorët e mëparshëm, e lartë mbetet pesha e industrisë nxjerrëse.

Janë investuar nga jashtë në këtë industri 64.62 milionë euro, nga 68.33 milionë në tremujorin e mëpardshëm. Sektori i tregtisë me shumicë dhe me pakicë; riparimi i automjeteve dhe motorcikletave është gjithashtu në rritje të dukshme krahasuar me tremujorët parardhës. Në fund të priudhës prill-qershor, flukset e investimeve të huaja në këtë sektor janë ngjitur në 44.09 milionë euro, nga 28.51 milionë në tremujorin e parë të vitit, dhe 28.26 miloinë në tremujorin e fundit të vitit të shkuar.

Në rënie fluksi i investimeve rezulton edhe në grupin Energjia elektrike, gazi, dhe furnizimi me ujë. Nga 41.76 milionë në tremujorin e fundit të vitit 2022, flukset e tyre kanë rënë përkatësisht në 34.68 milionë euro dhe  33.06 milionë euro në tremujorët e parë dhe të dytë të 2023.

Sa i përket vendeve të origjinës nga ato kanë ardhur, bie në sy rritje e fortë e fukseve nga Italia. Nga 43.21 milionë euro në tremujorin e parë, investimet nga ky shtet janë rritur në 66.41 milionë në të dytin. Në rritje fukset rezultojnë edhe nga Holanda, e cila edhe dominon këtë tregues. Nga 60.45 milionë euro në tremujorin e parë, investimet nga ky shtet, janë rritur në 64.88 milionë euro në të dytin.

Ndërkohë që në rënie të ndjeshme mbeten këtë tremujor investimet nga Turqia, një tjetër partner me të cilën vendi ynë mban lidhje të forta ekonomike. Nga 35.01 milionë euro në tremujorin e parë të këtij viti fluksi ka rënë në 33.06 në të dytin. Greqia është tjetër vend me rritje të dukshme të flukseve, nga 3.65 milionë në tremujorin e parë, në 12.98 në të dytin. Shifrat mbeten shumë të ulëta krahasuar me tremujorin e fundit të vitit të shkuar, kur fluksi i investimeve direkte nga ky vend kalonte 60 milionë euro. Rritje të moderuar nga shënuar flukset e investimeve nga Gjermania dhe Austria.

Lorenc Rabeta/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.