Rikthehet optimizmi për miratimin e ETF-ve – Bitcoin ngjitet pranë 43,000 USD, BlackRock rishikon propozimin

Tregu i kriptomonedhave i është rikthyer fitimeve në sesionin e sotëm, me bitcoin që i është afruar sërish 43,000 dollarëve, ndërsa ethereum është rritur në rreth 2,230 dollarë.

Tregu është mbështetur nga rikthimi i optimizmit se në fillim të vitit të ardhshëm, rregullatorët amerikanë do të miratojnë fondet e para të tregtuar në shkëmbim në bitcoin, ose siç nihen ndryshe ETF. Gjithashtu, investitorët kanë përfituar nga çmimi i ulët në sesionin e kaluar, për të blerë më shumë kriptomonedha.

Në treg ka një optimizëm se normat e interesit nga bankat qendrore do të ulen në gjysmën e parë të vitit 2024, që zakonisht rrisin kërkesën e investitorëve për asete me risk, ku bëjnë pjesë edhe kriptomonedhat.

Ndërkohë, disa kriptomonedha të tjera si Solana, Avalanche dhe Injective u rritën deri në 20% në 24 orët e fundit, ndërsa furia e tregtimit të të ashtuquajturave “meme coin” vijoi për javën e tretë me radhë. Tregtarët kanë preferuar gjithnjë e më shumë këto rrjete kundrejt Ethereum për tarifat shumë më të ulëta të transaksioneve dhe shpejtësisë më të madhe: kushton më pak se një cent dhe duhen disa sekonda për një transaksion të Solana, ndërsa Ethereum mund të kushtojë të paktën 15 dollarë dhe të zgjasë deri në një minutë.

Kjo ka çuar në më shumë aktivitet transaksionesh në këto rrjete, që është më shumë se dyfishuar në muajin e kaluar. Tregu i gjerë është mbështetur nga një listim i pritshëm i fondeve të tregtuara në shkëmbim (ETF) në SHBA, pasi të hënën vonë firma financiare BlackRock rishikoi propozimin e saj, me gjasë pas sugjerimeve të rregullatorëve.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.