Nafta ndal rritjen 2-ditore – Investitorët po vlerësojnë ndikimin e sulmeve në Detin e Kuq

Nafta ka ndalur vrullin e ditëve të fundit dhe po qëndron në rënie të lehtë në sesionin e sotëm, pasi investitorët po vlerësojnë ndikimin e mundshëm në furnizimin e tregut, nga sulmet e militantëve Houthi në Jemen, që mendohet se janë të lidhur me Iranin, kundër anijeve në Detin e Kuq. Këto sulme kanë ndërprerë tregtinë detare dhe kanë detyruar kompanitë të ndryshojnë rrugën e anijeve.

Çmimet e naftës bruto u rritën me rreth 2% të hënën, nga frika për ndërprerjen e tregtisë përmes Kanalit të Suezit, rruga më e shkurtër e transportit midis Evropës dhe Azisë, e cila përbën rreth 15% të trafikut global të transportit detar.

Nafta Brent e Londrës po tregtohet në rreth 77.5 dollarë për fuçi, ndërsa nafta Bruto amerikane, që skadon të enjten, po tregtohet në rreth 72 dollarë për fuçi. Megjithëse sulmet ndaj anijeve kanë rritur primin e rrezikut gjeopolitik, efekti aktual në furnizimin e globit me naftë ka të ngjarë të jetë i kufizuar, pasi këto sulme nuk kanë të bëjnë me asgjë që do të ndikonte prodhimin. Edhe analistët e Goldman Sachs thanë se ndërprerja nuk ka gjasa të ketë një efekt të madh në çmimet e naftës bruto dhe të gazit të lëngshëm natyror (LNG) sepse mundësitë për të gjetur një rrugë tjetër sugjerojnë që prodhimi nuk duhet të ndikohet drejtpërdrejt.

Gjiganti i prodhimit të naftës, BP ndaloi përkohësisht tranzitin përmes Detit të Kuq, ndërsa grupi i anijeve cisternë, Frontline tha të hënën se anijet e saj do të shmangnin këtë rrugë.

Sulmet ndaj anijeve kanë nxitur Shtetet e Bashkuara dhe aleatët e tjerë që të diskutojnë ngritjen e një “task force” që do të mbronte rrugët në Detin e Kuq, një veprim që Irani ka paralajmëruar se do të ishte një gabim. Investitorët po presin edhe të dhënat mbi rezervat e naftës për javën e kaluar në SHBA dhe analistët parashikojnë një rënie me 2.2 milionë fuçi.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.